Home / Poets / Mirza Ghalib

Mirza Ghalib

Yaad Hai Shadi Mein Bhi Hungama e Ya Rab Mujhe..

Mirza Ghalib Poetry

Yaad hai shaadi mein bhi hungama-e-ya-rab mujhe,
subha-e-zaahid hua hai khanda zer-e-lab mujhe.

Hai kushaad-e-khaatir-e-wa-basta dar rahn-e-sukhan,
tha tilism-e-qufl-e-abjad khaana-e-maktab mujhe.

Yaa rab iss aashuftagi ki daad kis se chaahiye,
rashk aasaaish pe hai zindaaniyon ki ab mujhe.

Taba hai mushtaaq-e-lazzat-ha-e-hasrat kya karun,
aarzoo se hai shikast-e-aarzoo matlab mujhe.

Dil laga kar aap bhi ‘ghalib’ mujhi se ho gaye,
ishq se aate the maane mirza saahib mujhe. !!

Mirza Ghalib

Warasta Us Se Hain Ki Mohabbat Hi Kyon Na Ho,,

Mirza Ghalib Poetry

Waarasta uss se hain ki mohabbat hi kyon na ho,
keeje humare saath adaawat hi kyon na ho.

Chhoda na mujh mein zof ne rang ikhtilaat ka,
hai dil pe baar naqsh-e-mohabbat hi kyon na ho.

Hai mujh ko tujh se tazkira-e-ghair ka gila,
har-chand bar-sabil-e-shikaayat hi kyon na ho.

Paida hui hai kehte hain har dard ki dawaa,
yun ho toh chaara-e-ghum-e-ulfat hi kyon na ho.

Daala na bekasi ne kisi se muaamla,
apne se kheenchta hun khajaalat hi kyon na ho.

Hai aadmi bajaa-e-khud ek mahshar-e-khyaal,
hum anjuman samajhte hain khalwat hi kyon na ho.

Hungama-e-zabuni-e-himmat hai infiaal,
haasil na kije dahr se ibrat hi kyon na ho.

Waarastagi bahaana-e-begaangi nahin,
apne se kar na ghair se wehshat hi kyon na ho.

MiTta hai faut-e-fursat-e-hasti ka ghum koi,
umr-e-aziz sarf-e-ibaadat hi kyon na ho.

Uss fitna-khu ke dar se ab uthte nahin ‘asad
uss mein humare sar pe qayaamat hi kyon na ho. !!

Mirza Ghalib

Yak-Zarra e Zameen Nahin Bekaar Baagh Ka..

Mirza Ghalib Poetry

Yak-zarra-e-zameen nahin bekaar baagh ka,
yan jaada bhi fatila hai laale ke daagh ka.

Be-mayy kise hai taaqat-e-aashob-e-aagahi,
kheencha hai ajz-e-hausla ne khat ayaagh ka.

Bulbul ke kaarobaar pe hain khanda-ha-e-gul,
kehte hain jis ko ishq khalal hai dimaagh ka.

Taaza nahin hai nashsha-e-fikr-e-sukhan mujhe,
tiryaaki-e-qadeem hun dud-e-charaagh ka.

Sau baar band-e-ishq se aazaad hum hue,
par kya karen ki dil hi adoo hai faraagh ka.

Be-khoon-e-dil hai chashm mein mauj-e-nigah ghubaar,
ye maikada kharaab hai mayy ke suraagh ka.

Baagh-e-shagufta tera bisaat-e-nashaat-e-dil,
abr-e-bahaar khum-kada kis ke dimaagh ka. !!

Click  here for read all  Mirza Ghalib Poetry Collection

Woh Aa Ke Khwaab Mein Taskeen e Iztiraab Toh De..

Mirza Ghalib Poetry

Woh aa ke khwaab mein taskeen-e-iztiraab toh de,
wale mujhe tapish-e-dil majaal-e-khwaab toh de.

Kare hai qatl lagaawat mein tera ro dena,
teri tarah koi tegh-e-nigah ko aab toh de.

Dikha ke jumbish-e-lab hi tamaam kar hum ko,
na de jo bosa toh munh se kahin jawaab toh de.

Pila de ouk se saaqi jo hum se nafrat hai,
pyala gar nahin deta na de sharaab toh de.

Asad’ khushi se mere haath paanv phuul gaye,
kaha jo uss ne zara mere paanv daab toh de.

Ye kaun kahwe hai aabaad kar humen lekin,
kabhi zamaana muraad-e-dil-e-kharaab toh de. !!

– Click  here for read all  Mirza Ghalib Poetry Collection

Zakhm Par Chhidken Kahan Tiflan-e-Beparwa Namak..

Mirza Ghalib Poetry

Zakhm par chhidken kahan tiflaan-e-be-parwa namak,
kya maza hota agar patthar mein bhi hota namak.

Gard-e-raah-e-yaar hai saamaan-e-naaz-e-zakhm-e-dil,
warna hota hai jahan men kis qadar paida namak.

Mujh ko arzaani rahe tujh ko mubaarak ho jyun,
naala-e-bulbul ka dard aur khanda-e-gul ka namak.

Shor-e-jaulaan tha kanaar-e-bahr par kis ka ki aaj,
gard-e-saahil hai ba-zakhm-e-mauja-e-dariya namak.

Daad deta hai mere zakhm-e-jigar ki waah waah,
yaad karta hai mujhe dekhe hai woh jis ja namak.

Chhod kar jaana tan-e-majrooh-e-aashiq haif hai,
dil talab karta hai zakhm aur maange hain aaza namak.

Ghair ki minnat na khinchunga pai-e-taufir-e-dard,
zakhm misl-e-khanda-e-qaatil hai sar-taa-paa namak.

Yaad hain ‘ghalib’ tujhe woh din ki wajd-e-zauq mein,
zakhm se girta toh main palkon se chunta tha namak. !!

– Click  here for read all  Mirza Ghalib Poetry Collection

Woh Meri Chin-e-Jabin Se Ghum-e-Pinhan Samjha..

Mirza Ghalib Poetry

Woh meri chin-e-jabin se ghum-e-pinhaan samjha,
raaz-e-maktoob ba-be-rabti-e-unwaan samjha.

Yak alif besh nahin saiqal-e-aaina hunuz,
chaak karta hun main jab se ki garebaan samjha.

Sharh-e-asbaab-e-giriftaari-e-khaatir mat poochh,
iss qadar tang hua dil ki main zindaan samjha.

Bad-gumaani ne na chaaha usey sargarm-e-khiraam,
rukh pe har qatra araq deeda-e-hairaan samjha.

Ijz se apne ye jaana ki woh bad-khoo hoga,
nabz-e-khas se tapish-e-shola-e-sozaan samjha.

Safar-e-ishq mein ki zof ne raahat-talabi,
har qadam saaye ko main apne shabistaan samjha.

Tha gurezaan mizha-e-yaar se dil taa dum-e-marg,
daf-e-paikaan-e-qaza iss qadar aasaan samjha.

Dil diya jaan ke kyon uss ko wafadaar ‘asad’
ghalati kii ki jo kaafir ko musalmaan samjha.

Hum ne wehshat-kada-e-bazm-e-jahaan mein jun shama,
shola-e-ishq ko apna sar-o-saamaan samjha. !!

– Click  here for read all  Mirza Ghalib Poetry Collection

Ye Hum Jo Hijr Mein Deewaar O Dar Ko Dekhte Hain..

Mirza Ghalib Poetry

Ye hum jo hijr mein deewaar-o-dar ko dekhte hain,
kabhi saba ko kabhi namabar ko dekhte hain.

Woh aaye ghar mein humare khuda ki qudrat hai,
kabhi hum un ko kabhi apne ghar ko dekhte hain.

Nazar lage na kahin uss ke dast-o-baazoo ko,
ye log kyon mere zakhm-e-jigar ko dekhte hain.

Tere jawaahir-e-tarf-e-kulah ko kya dekhen,
hum auj-e-taala-e-laal-o-gohar ko dekhte hain. !!

– Click  here for read all  Mirza Ghalib Poetry Collection