Home / Poets / Firaq Gorakhpuri

Firaq Gorakhpuri

Kisi Ka Yun Toh Hua Kaun Umar Bhar Phir Bhi..

Firaq Gorakhpuri Poetry

Kisi ka yun toh hua kaun umar bhar phir bhi,
ye husn-o-ishq ka dhokha hai sab magar phir bhi.

Hazaar baar zamana idhar se guzra hai,
nayi nayi si hai kuchh teri rahguzar phir bhi.

Khusha ishara-e-paiham zahe sukoot-e-nazar,
daraaz ho ke fasaana hai mukhtsar phir bhi.

Jhapak rahi hain zamaan-o-makaan ki bhi aankhen,
magar hai qaafila aamada-e-safar phir bhi.

Shab-e-firaq se aage hai aaj meri nazar,
ki kat hi jaayegi ye sham-e-be-sehar phir bhi.

Palat rahe hain gareeb-ul-watan paltana tha,
woh koocha roo-kash-e-jannat ho ghar hai ghar phir bhi.

Kharaab ho ke bhi socha kiye tere mehzoor,
yehi ki teri nazar hai teri nazar phir bhi.

Lipat gaya tera deewana garche manzil se,
udi udi si hai kuchh khaaq-e-rahguzar phir bhi.

Teri nigaah se bachne mein umar guzri hai,
utar gaya rag-e-jaan mein ye nashtar phir bhi.

Khata muaaf tera afav bhi hai misl-e-saza,
teri saza mein hai ek shaan-e-darguzar phir bhi.

Agarche bekhudi-e-ishq ko zamana hua,
firaq‘ karti rahi kaam woh nazar phir bhi. !!

Click Here For Firaq Gorakhpuri Poetry Collection

Bahut Pehle Se Un Qadmon Ki Aahat Jaan Lete Hain..

Firaq Gorakhpuri Poetry

Bahut pehle se un qadmon ki aahat jaan lete hain,
tujhe aye zindagi hum door se pehchaan lete hain.

Meri nazren bhi aise qaatilon ka jaan-o-imaan hain,
nigaahen milte hi jo jaan aur imaan lete hain.

Tabiyat apni ghabraati hai jab sunsaan raaton mein,
hum aise mein teri yaadon ki chaadar taan lete hain.

Khud apna faisla bhi ishq mein kaafi nahin hota,
Use bhi kaise kar guzren jo dil mein thaan lete hain.

Tujhe ghaata na hone denge kaarobaar-e-ulfat mein,
hum apne sar tera aye dost har ehsaan lete hain.

Humari har nazar tujh se nayi saugandh khaati hai,
toh teri har nazar se hum naya paimaam lete hain.

Jise soorat bataate hain pata deti hai seerat ka,
ibaarat dekh kar jis tarha maani jaan lete hain.

Firaq’ aksar badal kar bhes milta hai koi kaafir,
kabhi hum jaan lete hain kabhi pehchaan lete hain. !!

– Click Here For Firaq Gorakhpuri Poetry Collection

Bastiyan Dhoondh Rahi Hain Unhen Veeraanon Mein..

Firaq Gorakhpuri Poetry

Bastiyaan dhoondh rahi hain unhen veeraanon mein,
wehshaten badh gayi had se tere deewaanon mein.

Jis jagah baith gaye aag laga kar uthe,
garmiyaan hain kuchh abhi sokhta-saamaanon mein.

Wehshaten bhi nazar aati hain sar-parda-e-naaz,
daamanon mein hai ye aalam na garebaanon mein.

Ek rangeeni zaahir hai gulistaan mein agar,
ek shaadaabi-e-pinhaan hai bayaabaanon mein.

Ye jo har ghuncha-o-gul mein hai ek andaaz-e-junoon,
kuchh bayaabaan nazar aaye hain garebaanon mein.

Ab na woh raat jab ummeeden bhi kuchh thi tujh se,
ab na woh baat ghum-e-hijr ke afsaanon mein.

Tabke waada-e-mauhoomki tafseel ‘firaq
shab-e-furqat kahin kaTti hai in afsaanon mein. !!

– Click Here For Firaq Gorakhpuri Poetry Collection

Apne Ghum Ka Mujhe Kahan Ghum Hai..

Firaq Gorakhpuri Poetry

Apne ghum ka mujhe kahan ghum hai,
aye ki teri khushi muqaddam hai.

Uss ke shaitaan ko kahan taufiq,
ishq karna gunaah-e-aadam hai.

Ek tadap mauj-e-tah-nashin ki tarah,
zindagi ki bina-e-mokham hai.

Ye bhi nazm-e-hayaat hai koi,
zindagi, zindagi ka maatam hai.

Roop ke jot zer-e-paraahan,
gulsitaan par rida-e-shabnam hai.

Aah ye mehrbaaniyaan teri,
shaadmaani ki aankh purnam hai.

Narm-o-doshiza kis qadar hai nigaah,
har nazar daastaan-e-maryam hai.

Mehr-o-mah shola-haa-e-saaz-e-jamaal,
jis ki jhankaar itni maddham hai.

Diye jaati hai lau sadaa-e-‘firaq
haan wahi soz-o-saaz kam kam hai. !!

–  Click Here For Firaq Gorakhpuri Poetry Collection

Deedaar Mein Ek Tarfa Deedaar Nazar Aaya..

Firaq Gorakhpuri Poetry

Deedaar mein ek tarfa deedaar nazar aaya,
har baar chhupa koi har baar nazar aaya.

Subh-e-shab-e-hijraan ki woh chaak-girebaani,
ek aalam-e-nairangi har taar nazar aaya.

Jab chashm-e-siyah teri thi chhaai hui dil par,
uss mulk ka har khitta taataar nazar aaya.

Ghash kha ke gire moosa allaah re maayoosi,
halka sa woh parda bhi deewaar nazar aaya.

Zarra ho ki qatra ho khum-khaana-e-hasti mein,
makhmoor nazar aaya sarshaar nazar aaya.

Kya kuchh na hua ghum se kya kuchh na kiya ghum ne,
aur yun toh hua jo kuchh bekaar nazar aaya.

Aye ishq kasam tujh ko maamoora-e-aalam ki,
koi ghum-e-furqat mein ghum-khwaar nazar aaya.

Shab kat gayi furqat ki dekha na ‘firaq aakhir,
tool-e-ghum-e-hijraan bhi bekaar nazar aaya. !!

–  Click Here For Firaq Gorakhpuri Poetry Collection

Firaq Ek Nayi Soorat Nikal Toh Sakti Hai..

Firaq Gorakhpuri Poetry

Firaq ek nayi soorat nikal toh sakti hai,
ba-qaul uss aankh ke duniya badal toh sakti hai.

Tere khyaal ko kuchh chup si lag gayi warna,
kahaaniyon se shab-e-ghum behal toh sakti hai.

Ab itni band nahin ghum-kadon ki bhi raahen,
hawa-e-koocha-e-mahboob chal toh sakti hai.

Badalta jaaye ghum-e-rozgaar ka markaz,
ye chaal gardish-e-ayyaam chal toh sakti hai.

Teri nigaah sahara na de toh baat hai aur,
ki girte girte bhi duniya sambhal toh sakti hai.

Na bhoolna ye hai taakhir husn ki taakhir,
firaq‘aayi hui maut tal toh sakti hai. !!

–  Click Here For Firaq Gorakhpuri Poetry Collection

Ek Roz Hue The Kuchh Ishaaraat Khafi Se..

Firaq Gorakhpuri Poetry

Ek roz hue the kuchh ishaaraat khafi se,
aashiq hain hum uss nargis-e-raana ke jabhi se.

Ahbaab se rakhta hun kuchh ummeed-e-sharaafat,
rehte hain khafa mujh se bahut log issi se.

Aansoo ko mere khel tamaasha na samajhna,
kat jaata hai patthar issi heere ki kani se.

Kuchh zer-e-lab alfaaz khanakte hain faza mein,
goonji hui hai bazm teri kam-sukhni se.

Khud mujh ko bhi taa-der khabar ho nahin paayi,
aaj aayi teri yaad iss aahista-rawi se.

Ek dil ke siwa paas humaare nahin kuchh bhi,
jo kaam ho le lete hain hum log issi se.

Rehta hun ‘firaq iss liye waarfta ki duniya,
kuchh hosh mein aa jaaye meri bekhabari se. !!

– Click Here For Firaq Gorakhpuri Poetry Collection