Home / Poets / Akbar Allahabadi (page 3)

Akbar Allahabadi

Aankhen Mujhe Talvon Se Woh Malne Nahin Dete..

Aankhen mujhe talvon se woh malne nahin dete,
armaan mere dil ka nikalne nahin dete.

Khaatir se teri yaad ko talne nahin dete,
sach hai ki hamin dil ko sambhalne nahin dete.

Kis naaz se kehte hain woh jhunjhla ke shab-e vasl,
tum toh humein karwat bhi badalne nahin dete.

Parwaanon ne faanoos ko dekha toh ye bole,
kyon hum ko jalaate ho ki jalne nahin dete.

Hairaan hun kis tarah karun arz-e tamanna,
dushman ko toh pehlu se woh talne nahin dete.

Dil woh hai ki fariyaad se labrez hai har waqt,
hum woh hain ki kuchh munh se nikalne nahin dete.

Garmi-e mohabbat mein woh hai aah se maane,
pankha nafas-e sard ka jhalne nahin dete. !!

Akbar Allahabadi

Saans Lete Hue Bhi Darta Hun..

Saans lete hue bhi darta hun,
ye na samajhen ki aah karta hun.

Bahr-e hasti mein hun misaal-e habaab,
mit hi jata hun jab ubharta hun.

Itni aazaadi bhi ghanimat hai,
saans leta hun, baat karta hun.

Shekh saahab khuda se darte hon,
main toh angrezon hi se darta hun.

Aap kya poochhte hain mera mizaaj,
shukr allaah ka hai marta hun.

Ye bada aib mujh mein hai ‘akbar
dil mein jo aaye keh guzarta hun. !!

Akbar Allahabadi

Dil Mera Jis Se Behalta Koi Aisa Na Mila..

Dil mera jis se behalta koi aisa na mila,
buut ke bande mile allaah ka banda na mila.

Bazm-e yaaran se phiri baad-e bahaari maayoos,
ek sar bhi usey aamada-e sauda na mila.

Gul ke khwahaan toh nazar aaye bahut itr-farosh
taalib-e zamzama-e-bulbul-e-shaida na mila.

Waah kya raah dikhaai hamein murshid ne,
kar diya kaabe ko gum aur kalisa na mila.

Rang chehre ka toh college ne bhi rakha qaayam,
rang-e-baatin mein magar baap se beta na mila.

Sayyad uthe jo gazette le ke toh laakhon laaye,
shaikh quraan dikhaate phire paisa na mila.

Hoshyaaron mein toh ek ek se siwa hain ‘akbar
mujh ko deewanon mein lekin koi tujh sa na mila. !!

Akbar Allahabadi

Hungama Hai Kyon Barpa Thodi Si Jo Pee Li Hai..

Hungama hai kyon barpa thodi si jo pee li hai
daaka toh nahin daala chori toh nahin ki hai.

Na-tajraba-kaari se waaiz ki ye hain baaten
iss rang ko kya jaane puchho toh kabhi pee hai.

Uss mayy se nahin matlab dil jis se hai begaana
maqsood hai uss mayy se dil hi mein jo khinchti hai.

Waan dil mein ki sadme do,  yaan jee mein ki sab sah lo
un ka bhi ajab dil hai, mera bhi ajab jee hai.

Har zarra chamakta hai anawaar-e ilaahi se
har saans ye kehti hai hum hain toh khuda bhi hai.

Sooraj mein lage dhabba fitarat ke karishme hain
buut hum ko kahen kaafir allaah ki marzi hai.

Taleem ka shor aisa tehzeeb ka ghul itna
barkat jo nahin hoti neeyat ki kharaabi hai.

Sach kehte hain shekh ‘akbar taa-at-ehaq laazim
haan tark-e mayy-o shaahid ye un ki buzurgee hai. !!

Akbar Allahabadi

Duniya Mein Hun Duniya Ka Talabgaar Nahin Hun..

Duniya mein hun, duniya ka talabgaar nahin hun
bazaar se guzra hun, kharidaar nahin hun.

Zinda hun magar zeest ki lazzat nahi baaqi
har-chand ki hun hosh mein, hoshiyar nahin hun.

Iss khana-e hasti se guzar jaaunga be-laus
saaya hun faqat naqsh-ba-deewar nahin hun.

Afasurda hun ibaarat se dawaa ki nahin haajat
ghum ka mujhe ye zauf hai beemaar nahin hun.

Woh gul hun khizan ne jise barbaad kiya hai
uljhun kisi daaman se main woh khaar nahin hun.

Ya rabb mujhe mahfooz rakh uss buut ke sitam se
main uss ki inaayat ka talabgaar nahin hun.

Go daava-e taqwaa nahin dargaah-e khuda mein
buut jis se hon khush aisa gunahgaar nahin hun.

Afsurdagi-o zauf ki kuchh had nahin ‘akbar
kaafir ke muqaabil mein bhi deen-daar nahin hun. !!

Akbar Allahabadi

Hun Main Parwaana Magar Shama Toh Ho, Raat Toh Ho..

Hun main parwaana magar shama toh ho, raat toh ho
jaan dene ko hun maujood koi baat toh ho.

Dil bhi haajir, sar-e tasleem bhi kham ko maujood
koi markaz ho, koi qibla-e hajaat toh ho.

Dil toh bechain hai izhaar-e iraadat ke liye
kisi jaanib se kuchh izhaar-e karamaat toh ho.

Dil-kusha baada-e saafi ka kise zauq nahin
baatin-afroz koi peer-e kharabaat toh ho.

Guftani hai dil-e pur-dard ka qissa lekin
kis se kahiye koi mustafsir-e halaat toh ho.

Daastaan-e ghum-e dil kaun kahe, kaun sune
bazm mein mauqa-e izhaar-e khyaalaat toh ho.

Waade bhi yaad dilaate hain, gile bhi hain bahut
woh dikhaayi bhi toh dein, un se mulaaqaat toh ho.

Koi waaiz nahin fitrat se balaagat mein siwa
magar insaan mein kuchh fahm-e ishaaraat toh ho. !!