Home / Poets / Akbar Allahabadi (page 2)

Akbar Allahabadi

Nayi Tehzeeb Se Saaqi Ne Aisi Garm-joshi Ki..

Nayi tehzeeb se saaqi ne aisi garm-joshi ki,
ki aakhir muslimon mein rooh phoonki baada-noshi ki.

Tumhari policy ka haal kuchh khulta nahin saahab,
humari policy toh saaf hai imaan-faroshi ki.

Chhupaane ke evaz chhapwa rahe hain khud woh aib apne,
naseehat kya karun main qaum ko ab aib-poshi ki.

Pehan’ne ko toh kapde hi na the kya bazm mein jaate,
khushi ghar baithe kar li hum ne jashn-e taaj-poshi ki.

Reaaya ko munaasib hai ki baaham dosti rakhen,
himaaqat haakimon se hai tawaqqo garm-joshi ki. !!

Akbar Allahabadi

Har Qadam Kehta Hai Tu Aaya Hai Jaane Ke Liye..

Har qadam kehta hai tu aaya hai jaane ke liye,
manzil-e hasti nahin hai dil lagaane ke liye.

Kya mujhe khush aaye ye hairat-sara-e-be-sabaat,
hosh udne ke liye hain jaan jaane ke liye.

Dil ne dekha hai bisaat-e-quwwat-e-idraak ko,
kya badhe iss bazm mein aankhen uthaane ke liye.

Khoob umeedein bandhi lekin hui hirmaan naseeb,
badliyaan uthi magar bijli giraane ke liye.

Saans ki tarkeeb par mitti ko pyaar aa hi gaya,
khud hui qaid uss ko seene se lagaane ke liye.

Jab keha maine bhula do ghair ko hans kar keha,
yaad phir mujh ko dilaana bhool jaane ke liye.

Deeda-baazi woh kahan aankhen raha karti hain band,
jaan hi baaqi nahin ab dil lagaane ke liye.

Mujh ko khush aayi hai masti shekh jii ko farbahi,
main hun peene ke liye aur woh hain khaane ke liye.

Allaah allaah ke siwa aakhir raha kuchh bhi na yaad,
jo kiya tha yaad sab tha bhool jaane ke liye.

Sur kahan ke saaz kaisa, kaisi bazm-e-saameen
josh-e-dil kaafi hai ‘akbar taan udaane ke liye. !!

Akbar Allahabadi

Dil-e Maayoos Mein Woh Shorishen Barpaa Nahin Hoti..

Dil-e maayoos mein woh shorishen barpaa nahin hoti,
umeedein iss qadar tooti ki ab paidaa nahin hoti.

Meri betaabiyaan bhi juzv hain ek meri hasti ki,
ye zaahir hai ki maujen khaarij az dariya nahin hoti.

Wahi pariyaan hain ab bhi raaja inder ke akhaade mein,
magar shahzaada-e gulfaam par shaida nahin hoti.

Yahan ki auraton ko ilm ki parwaah nahin be-shak,
magar ye shauharon se apne beparwaah nahin hoti.

Taalluq dil ka kya baaqi main rakhun bazm-e duniya se,
woh dilkash sooraten ab anjuman-aara nahin hoti.

Hua hun iss qadar afsurda rang-e-baagh-e-hasti se,
hawaayen fasl-e gul ki bhi nashaat-afzaa nahin hoti.

Qazaa ke saamne bekaar hote hain hawaas ‘akbar
khuli hoti hain go aankhen magar beena nahin hoti. !!

Akbar Allahabadi

Ye Sust Hai Toh Phir Kya Woh Tez Hai Toh Phir Kya..

Ye sust hai toh phir kya woh tez hai toh phir kya,
native jo hai toh phir kya angrez hai toh phir kya.

Rehna kisi se dab kar hai aman ko zaroori,
phir koi firqa haibat-angez hai toh phir kya.

Ranj-o khushi sab mein taqseem hai munaasib,
baabu jo hai toh phir kya changez hai toh phir kya.

Har rang mein hain paate bande khuda ke rozi,
hai painter toh phir kya rangrez hai toh phir kya.

Jaisi jise zaroorat waisi hi uss ki cheezen,
yaan takht hai toh phir kya waan mez hai toh phir kya.

Mafqood hain ab iss ke sun’ne samajhne wale,
mera sukhan naseehat-aamez hai toh phir kya. !!

Akbar Allahabadi

Charkh Se Kuchh Umeed Thi Hi Nahin..

Charkh se kuchh umeed thi hi nahin,
aarzoo maine koi ki hi nahin.

Mazhabi behas maine ki hi nahin,
faaltu aql mujh mein thi hi nahin.

Chaahta tha bahut si baaton ko,
magar afsos ab woh jee hi nahin.

Jurrat-e arz-e haal kya hoti,
nazar-e lutf uss ne ki hi nahin.

Iss museebat mein dil se kya kehta,
koi aisi misaal thi hi nahin.

Aap kya jaanen qadr-e-yaa-allaah,
jab museebat koi padi hi nahin.

Shirk chhoda toh sab ne chhod diya,
meri koi society hi nahin.

Poochha ‘akbar hai aadmi kaisa,
hans ke woh bole woh aadmi hi nahin. !!

Akbar Allahabadi

Ghamza Nahin Hota Ki Ishaara Nahin Hota..

Ghamza nahin hota ki ishaara nahin hota,
aankh un se jo milti hai toh kya kya nahin hota.

Jalwa na ho maani ka toh soorat ka asar kya,
bulbul gul-e tasveer ka shaida nahin hota.

Allah bachaaye marz-e ishq se dil ko,
sunte hain ki ye aariza achchha nahin hota.

Tashbeeh tere chehre ko kya dun gul-e tar se,
hota hai shagufta magar itna nahin hota.

Main nazaa mein hun aayen toh ehsaan hai un ka,
lekin ye samajh lein ki tamaasha nahin hota.

Hum aah bhi karte hain toh ho jaate hain badnaam,
woh qatl bhi karte hain toh charcha nahin hota. !!

Akbar Allahabadi

Bahut Raha Hai Kabhi Lutf-e Yaar Hum Par Bhi..

Bahut raha hai kabhi lutf-e yaar hum par bhi,
guzar chuki hai ye fasl-e bahaar hum par bhi.

Uroos-e-dahr ko aaya tha pyaar hum par bhi,
ye beswaa thi kisi shab nisaar hum par bhi.

Bitha chuka hai zamana humein bhi masnad par,
hua kiye hain jawaahir nisaar hum par bhi.

Adoo ko bhi jo banaya hai tum ne marham-e raaz,
toh fakhr kya jo hua aitbaar hum par bhi.

Khata kisi ki ho lekin khuli jo un ki zabaan,
toh ho hi jaate hain do ek waar hum par bhi.

Hum aise rind magar ye zamana hai woh ghazab,
ki daal hi diya duniya ka baar hum par bhi.

Humein bhi aatish-e ulfat jalaa chuki ‘akbar
haraam ho gayi dozakh ki naar hum par bhi. !!

Akbar Allahabadi