Home / Poets / Akbar Allahabadi

Akbar Allahabadi

Khatm Kiya Saba Ne Raqs Gul Pe Nisaar Ho Chuki..

Khatm kiya saba ne raqs gul pe nisaar ho chuki,
josh-e-nashaat ho chuka saut-e-hazaar ho chuki.

Rang-e banafsha mit gaya sumbul-e-tar nahin raha,
sehan-e-chaman mein zeenat-e-naqs-o-nigaar ho chuki.

Masti-e-laala ab kahan uss ka pyala ab kahan,
daur-e-tarab guzar gaya aamad-e-yaar ho chuki.

Rutt woh jo thi badal gayi, aayi bas aur nikal gayi
thi jo hawaa mein nik.hat-e-mushk-e-tataar ho chuki.

Ab tak ussi rawish pe hai ‘akbar mast-o-bekhabar,
keh de koi azeez-e-mann fasl-e-bahaar ho chuki. !!

Akbar Allahabadi

Maani Ko Bhula Deti Hai Soorat Hai Ab Toh Ye Hai..

Maani ko bhula deti hai soorat hai ab toh ye hai,
nature bhi sabaq seekh le zeenat hai toh ye hai.

Kamre mein jo hansti hui aai miss-e-raana,
teacher ne keha ilm ki aafat hai toh ye hai.

Ye baat toh acchhi hai ki ulfat ho mison se,
hoor un ko samajhte hain qayaamat hai toh ye hai.

Pecheeda masaail ke liye jaate hain england,
zulfon mein ulajh aate hain, shaamat hai toh ye hai.

Public mein zara haath mila lijiye mujh se,
saahab mere imaan ki qeemat hai toh ye hai. !!

Akbar Allahabadi

Khush Hain Sab Ki Operation Mein Khoob Nashtar Ye Chal Raha Hai..

Khush hain sab ki operation mein khoob nashtar ye chal raha hai,
kisi ko iss ki khabar nahin hai mareez ka dum nikal raha hai.

Fanaa issi rang par hai qaayam falak wahi chaal chal raha hai,
Shikasta-o muntashir hai woh kal jo aaj saanche mein dhal raha hai.

Ye dekhte ho jo kaasa-esar ghuroor-e-ghaflat se kal tha mamloo,
yehi badan naaz se palaa tha jo aaj mitti mein gal raha hai.

Samajh ho jis ki baligh samjhe nazar ho jis ki waisa dekhe,
abhi yahan khaak bhi udegi jahan ye qulzum ubal raha hai.

Kahan ka sharqi kahan ka garbi tamaam dukh sukh hai ye masaawi,
yahan bhi ek ba-muraad khush hai wahan bhi ek ghum se jal raha hai.

Urooj-e-qaumi, zawaal-e-qaumi khuda ki qudrat ke hain karishme,
humesha radd-o-badal ke andar ye amr political raha hai.

Mazaa hai speech ka dinner mein khabar ye chhapti hai ye pioneer mein,
falak ki gardish ke saath hi saath kaam yaaron ka chal raha hai. !!

–  Akbar Allahabadi

Jahaan Mein Haal Mera Iss Qadar Zaboon Hua..

Jahaan mein haal mera iss qadar zaboon hua,
ki mujh ko dekh ke bismil ko bhi sukoon hua.

Ghareeb dil ne bahut aarzuen paida ki,
magar naseeb ka likha ki sab ka khoon hua.

Woh apne husn se waaqif main apni aql se sair,
unhone hosh sambhaala mujhe junoon hua.

Umeed-e-chashm-emurawwat kahan rahi baaqi,
zariya baaton ka jab sirf telephone hua.

Nigaah-e-garm christmas mein bhi rahi hum par,
humaare haq mein december bhi maah-e-june hua. !!

Akbar Allahabadi

Dasht-e-ghurbat Hai Alaalat Bhi Hai Tanhaai Bhi..

Dasht-e ghurbat hai alaalat bhi hai tanhaai bhi,
aur un sab ne fuzoon baadiya-paimaai bhi.

Khwaab-e raahat hai kahaan neend bhi aati nahin ab,
bas uchat jaane ko aayi jo kabhi aayi bhi.

Yaad hai mujh ko woh be-fikri o aaghaaz-e shabaab,
shukhan-aaraai bhi thi anjuman-aaraai bhi.

Nigaah-e-shauq-o-tamanna ki woh dilkash thi kamand,
jis se ho jaate the raam aahoo-e-aaraai bhi.

Hum sanam-khana jahan karte the apna qaayam,
phir khade hote the waan hoor ke shaidaai bhi.

Ab na woh umar na woh log na woh lail-o-nahaar,
bujh gayi taba kabhi josh pe gar aai bhi.

Ab toh shubhe bhi mujhe dev nazar aate hain,
uss zamaane mein pari-zaad thi ruswaai bhi.

Kaam ki baat jo kehni ho woh keh lo ‘akbar
dum mein chhin jaayegi ye taaqat-e-goyaai bhi. !!

Akbar Allahabadi

Phir Gayi Aap Ki Do Din Mein Tabeeyat Kaisi..

Phir gayi aap ki do din mein tabeeyat kaisi,
ye wafa kaisi thi saahab ye murawwat kaisi.

Dost ahbaab se hans bol ke kat jaayegi raat,
rind-e aazaad hain hum ko shab-e furqat kaisi.

Jis haseen se hui ulfat wahi mashooq apna,
ishq kis cheez ko kehte hain tabeeyat kaisi.

Hai jo qismat mein wahi hoga na kuchh kam na siwa,
aarzoo kehte hain kis cheez ko hasrat kaisi.

Haal khulta nahin kuchh dil ke dhadakne ka mujhe,
aaj reh reh ke bhar aati hai tabeeyat kaisi.

Koocha-e yaar mein jata toh nazaara karta,
qais aawaara hai jungle mein ye wehshat kaisi. !!

 – Akbar Allahabadi

Khushi Kya Ho Jo Meri Baat Woh Buut Maan Jata Hai..

Khushi kya ho jo meri baat woh buut maan jata hai,
mazaa toh behad aata hai magar imaan jata hai.

Banun council mein speaker toh rukhsat qirat-e-misri,
karun kya membari jaati hai ya quraan jata hai.

Zawaal-e-jaah o daulat mein bas itni baat achchhi hai,
ki duniya mein bakhubi aadmi pehchaan jata hai.

Nayi tehzeeb mein diqqat zyada toh nahin hoti,
mazaahib rahte hain qaayam faqat imaan jata hai.

Theater raat ko aur din ko yaaron ki ye speechen,
duhaai laatt saahab ki mera imaan jata hai.

Jahan dil mein ye aayi kuchh kahun woh chal diya uth kar,
ghazab hai fitna hai zaalim nazar pehchaan jata hai.

Chunaan burdoond sabr az dil ke qisse yaad aate hain,
tadap jata hun ye sun kar ki ab imaan jata hai. !!

Akbar Allahabadi

Nayi Tehzeeb Se Saaqi Ne Aisi Garm-joshi Ki..

Nayi tehzeeb se saaqi ne aisi garm-joshi ki,
ki aakhir muslimon mein rooh phoonki baada-noshi ki.

Tumhari policy ka haal kuchh khulta nahin saahab,
humari policy toh saaf hai imaan-faroshi ki.

Chhupaane ke evaz chhapwa rahe hain khud woh aib apne,
naseehat kya karun main qaum ko ab aib-poshi ki.

Pehan’ne ko toh kapde hi na the kya bazm mein jaate,
khushi ghar baithe kar li hum ne jashn-e taaj-poshi ki.

Reaaya ko munaasib hai ki baaham dosti rakhen,
himaaqat haakimon se hai tawaqqo garm-joshi ki. !!

Akbar Allahabadi

Har Qadam Kehta Hai Tu Aaya Hai Jaane Ke Liye..

Har qadam kehta hai tu aaya hai jaane ke liye,
manzil-e hasti nahin hai dil lagaane ke liye.

Kya mujhe khush aaye ye hairat-sara-e-be-sabaat,
hosh udne ke liye hain jaan jaane ke liye.

Dil ne dekha hai bisaat-e-quwwat-e-idraak ko,
kya badhe iss bazm mein aankhen uthaane ke liye.

Khoob umeedein bandhi lekin hui hirmaan naseeb,
badliyaan uthi magar bijli giraane ke liye.

Saans ki tarkeeb par mitti ko pyaar aa hi gaya,
khud hui qaid uss ko seene se lagaane ke liye.

Jab keha maine bhula do ghair ko hans kar keha,
yaad phir mujh ko dilaana bhool jaane ke liye.

Deeda-baazi woh kahan aankhen raha karti hain band,
jaan hi baaqi nahin ab dil lagaane ke liye.

Mujh ko khush aayi hai masti shekh jii ko farbahi,
main hun peene ke liye aur woh hain khaane ke liye.

Allaah allaah ke siwa aakhir raha kuchh bhi na yaad,
jo kiya tha yaad sab tha bhool jaane ke liye.

Sur kahan ke saaz kaisa, kaisi bazm-e-saameen
josh-e-dil kaafi hai ‘akbar taan udaane ke liye. !!

Akbar Allahabadi

Dil-e Maayoos Mein Woh Shorishen Barpaa Nahin Hoti..

Dil-e maayoos mein woh shorishen barpaa nahin hoti,
umeedein iss qadar tooti ki ab paidaa nahin hoti.

Meri betaabiyaan bhi juzv hain ek meri hasti ki,
ye zaahir hai ki maujen khaarij az dariya nahin hoti.

Wahi pariyaan hain ab bhi raaja inder ke akhaade mein,
magar shahzaada-e gulfaam par shaida nahin hoti.

Yahan ki auraton ko ilm ki parwaah nahin be-shak,
magar ye shauharon se apne beparwaah nahin hoti.

Taalluq dil ka kya baaqi main rakhun bazm-e duniya se,
woh dilkash sooraten ab anjuman-aara nahin hoti.

Hua hun iss qadar afsurda rang-e-baagh-e-hasti se,
hawaayen fasl-e gul ki bhi nashaat-afzaa nahin hoti.

Qazaa ke saamne bekaar hote hain hawaas ‘akbar
khuli hoti hain go aankhen magar beena nahin hoti. !!

Akbar Allahabadi