Home / Poets / Ahmad Faraz (page 3)

Ahmad Faraz

Aise Chup Hain Ki Ye Manzil Bhi Kadi Ho Jaise..

alone-sad-boy-man-sitting-thinking-depressed-ahmad-faraz-poetry-shayari

Aise chup hain ki ye manzil bhi kadi ho jaise,
tera milna bhi judaai ki ghadi ho jaise.

Apne hi saaye se gaam laraz jata hun,
raaste mein koi deewar khadi ho jaise.

Kitne nadaan hain tere bhulne wale ki tujhe,
yaad karne ke liye umar padi ho jaise.

Tere maathe ki shikan pehle bhi dekhi thi magar,
ye girah ab ke mere dil mein padi ho jaise.

Manzilen door bhi hain manzilen nazdeek bhi hain,
apne hi paaon mein zanjeer padi ho jaise.

Aaj dil khol ke roye hain toh yun khush hain faraz,
chand lamhon ki ye raahat bhi badi ho jaise. !!

Zindagi Se Yehi Gila Hai Mujhe..

romantic_couple_painting_girl seeing in boy's eyes_happy couple_cute_lovers_ahmad faraz_poetry_shayari_artpic_drawing_sketch

Zindagi se yehi gila hai mujhe,
tu bahut der se mila hai mujhe.

Tu mohabbat se koi chaal toh chal,
haar jaane ka hausla hai mujhe.

Dil dhadakta nahin tapakta hai,
kal jo khwaahish thi aabla hai mujhe.

Humsafar chahiye hujoom nahin,
ek musaafir bhi qaafila hai mujhe.

Kohkan ho ki qais ho ki ‘faraz
sab mein ek shakhs hi mila hai mujhe. !!

Chal Nikalti Hain Ghum-e Yaar Se Baaten Kya Kya..

Chal nikalti hain ghum-e yaar se baaten kya kya,
humne bhi ki dar-o deewar se baaten kya kya.

Baat ban aayi hai phir se ki mere baare mein,
uss ne poochhi mere ghum-khwaar se baaten kya kya.

Log labb-basta agar hon toh nikal aati hain,
chup ke pairaaya-e izhaar se baaten kya kya.

Kisi soudaai ka qissa kisi harjaai ki baat,
log le aate hain bazaar se baaten kya kya.

Humne bhi dasht-shanaasi ke bahaane ki hain,
haath mein haath liye pyaar se baaten kya kya.

Kis ko bikna tha magar khush hain ki iss heele se,
ho gayi apne khareedaar se baaten kya kya.

Hum hain khamosh ki majboor-e mohabbat the ‘faraz
warna mansoob hain sarkaar se baaten kya kya. !!

Aisa Hai Ki Sab Khwaab Musalsal Nahin Hote..

Aisa hai ki sab khwaab musalsal nahin hote,
jo aaj toh hote hain magar kal nahin hote.

Andar ki fazaaon ke karishme bhi ajab hain,
menh toot ke barse bhi toh baadal nahin hote.

Kuchh mushkilein aisi hain ki aasaan nahin hoti,
kuchh aise muamme hain kabhi hal nahin hote.

Shaaistagi-e ghum ke sabab aankhon ke sehraa,
namnaak toh ho jaate hain jal-thal nahin hote.

Kaisi hi talaatum hon magar qulzum-e jaan mein,
kuchh yaad jazeere hain ki ojhal nahin hote.

Ushshaaq ke maanind kayi ehal-e hawas bhi,
paagal toh nazar aate hain paagal nahin hote.

Sab khwaahishen poori hon ‘faraz aisa nahin hai,
jaise kayi ashaar mukammal nahin hote. !!

Agarche Zor Hawaon Ne Daal Rakha Hai..

Agarche zor hawaon ne daal rakha hai,
magar charaagh ne lau ko sambhaal rakha hai.

Mohabbaton mein toh milna hai ya ujad jana,
mizaaj-e ishq mein kab etidaal rakha hai.

Hawa mein nasha hi nasha fazaa mein rang hi rang,
ye kis ne pairhan apna uchhaal rakha hai.

Bhale dino ka bharosa hi kya rahen na rahen,
so maine rishta-e ghum ko bahaal rakha hai.

Hum aise sada-dilon ko woh dost ho ki khuda,
sabhi ne wada-e fardaa pe taal rakha hai.

Hisaab lutf-e hareefan kiya hai jab toh khula,
ki doston ne zyada khyaal rakha hai.

Bhari bahaar mein ek shaakh par khila hai gulaab,
ki jaise tune hatheli pe gaal rakha hai.

Faraz’ ishq ki duniya toh khoobsurat thi,
ye kisne fitna-e-hijr-o-visaal rakha hai. !!

Ab Aur Kya Kisi Se Marasim Badhaayen Hum..

Ab aur kya kisi se marasim badhaayen hum,
ye bhi bahut hai tujh ko agar bhool jaaye hum.

Sehra-e zindagi mein koi dusra na tha,
sunte rahe hain aap hi apni sadaayen hum.

Iss zindagi mein itni faraaght kise naseeb,
itna na yaad aa ki tujhe bhool jaayen hum.

Tu itni dil-zada toh na thi aye shab-e firaaq,
aa tere raaste mein sitaare lutaayen hum.

Woh log ab kahan hain jo kehte the kal ‘faraz
haye haye khuda-na-karda tujhe rulaayen hum. !!

Abhi Kuchh Aur Karishme Ghazal Ke Dekhte Hain..

Abhi kuchh aur karishme ghazal ke dekhte hain,
faraz ab zara lehza badal ke dekhte hain.

Judaaiyan toh muqaddar hain phir bhi jaan-e safar,
kuchh aur door zara saath chal ke dekhte hain.

Raah-e wafa mein hareef-e khiraam koi toh ho,
so apne aap se aage nikal ke dekhte hain.

Tu saamne hai toh phir kyon yakeen nahin aata,
ye baar baar jo aankhon ko mal ke dekhte hain.

Ye kaun log hain maujood teri mehfil mein?
jo laalachon se tujhe, mujh ko jal ke dekhte hain.

Ye qurb kya hai ki yak-jaan hue na door rahe,
hazaar ek hi qaalib mein dhal ke dekhte hain.

Na tujh ko maat hui na mujh ko maat hui,
so ab ke dono hi chaalen badal ke dekhte hain.

Ye kaun hai sar-e saahil ki doobne wale,
samundaron ki tahon se uchhal ke dekhte hain.

Abhi talak toh na kundan hue na raakh hue,
hum apni aag mein har roz jal ke dekhte hain.

Bahut dino se nahin hai kuchh uss ki khair khabar,
chalo ‘faraz ko aye yaar chal ke dekhte hain. !!