Home / Poets / Ahmad Faraz (page 2)

Ahmad Faraz

Yun Hi Mar Mar Ke Jiyen Waqt Guzaare Jaayen..

Yun hi mar mar ke jiyen waqt guzaare jaayen,
zindagi hum tere haathon se na maare jaayen.

Ab zameen par koi gautam na mohammad na maseeh,
aasmaanon se naye log utaare jaayen.

Woh jo maujood nahin uss ki madad chaahte hain,
woh jo sunta hi nahin uss ko pukaare jaayen.

Baap larzaan hai ki pahunchi nahin baraat ab tak,
aur hum-joliyaan dulhan ko sanwaare jaayen.

Hum ki nadaan juaari hain sabhi jaante hain,
dil ki baazi ho toh jee-jaan se haare jaayen.

Taaj diya tum ne dar-e yaar bhi uktaa ke ‘faraz
ab kahaan dhoondhne ghum-khwaar tumhaare jaayen. !!

Gairat-e Ishq Salaamat Thi, Anaa Zinda Thi..

Gairat-e ishq salaamat thi anaa zinda thi,
woh bhi din the ki raah-o rasm-e wafa zinda thi.

Qais ko dosh na do rakhiyo na farhaad ko naam,
inhi logon se mohabbat ki adaa zinda thi.

Shehar-e beemar ke har koocha-o baam-o dar par,
hum bhi marte the ki jab khalq-e khuda zinda thi.

Bujh gayi shamaayen toh dum tod gaye jhounke bhi,
jis tarah zehar-e raqaabat se hawa zinda thi.

Yaad-e ayyaam ki sehra-e mohabbat mein ‘faraz
jaras-e qaafila-e dil ki sadaa zinda thi. !!

Baithe The Log Pehlu-ba Pehlu Piye Hue..

Baithe the log pehlu-ba pehlu piye hue,
ek hum the teri mehfil mein aansoo piye hue.

Dekha jise bhi uss ki mohabbat mein mast tha,
jaise tamaam shehar ho daaru piye hue.

Taqraar besabab toh na thi rind-o shaikh mein,
karte bhi kya sharaab the har do piye hue.

Phir kya ajab ki log bana lein kahaniyan,
kuchh main nashe mein choor tha kuchh tu piye hue.

Yun un labbon ke mas se moattar hun jis tarah,
woh naubahaar-e-naaz tha khushboo piye hue.

Yun ho agar ‘faraz toh tasweer kya bane,
ek shaam uss ke saath labb-e-joo piye hue. !!

Ajab Junoon-e Musaafat Mein Ghar Se Nikla Tha..

Alone-sad-man-boy-walking-in desert-ahmad faraz-petry-shayari-shair

Ajab junoon-e musaafat mein ghar se nikla tha,
khabar nahin hai ki sooraj kidhar se nikla tha.

Ye kaun phir se unhi raaston mein chhod gaya,
abhi abhi toh azaab-e safar se nikla tha.

Ye teer dil mein magar be-sabab nahin utra,
koi toh harf lab-e chaaragar se nikla tha.

Ye ab jo aag bana shehar shehar phila hai,
yehi dhuaan mere deewaar-o dar se nikla tha.

Main raat toot ke roya toh chain se soya,
ki dil ka zehar meri chasm-e tar se nikla tha.

Ye ab jo sar hain khameeda kulaah ki khaatir,
ye aib bhi toh hum ahl-e hunar se nikla tha.

Woh qais ab jise majnoo pukaarte hain ‘faraz
teri tarah koi deewaana ghar se nikla tha. !!

Awwal Awwal Ki Dosti Hai Abhi..

Romantic-Happily_cute_couple_painting_drawing_ahmad Faraz_poetry_shayari_boy with guitar_girl on boy's shoulder

Awwal awwal ki dosti hai abhi,
ek ghazal hai ki ho rahi hai abhi.

Main bhi shehar-e wafa mein nau-waarid,
woh bhi ruk ruk ke chal rahi hai abhi.

Main bhi aisa kahan ka zood-shanaas,
woh bhi lagta hai sochti hai abhi.

Dil ki wafadaari hai apni jagah,
phir bhi kuchh ehtiyaat si hai abhi.

Garche pehla sa ijtinaab nahin,
phir bhi kam kam supurdagi hai abhi.

Kaisa mausam hai kuchh nahin khulta,
boonda-baandi bhi dhoop bhi hai abhi.

Khud-kalaami mein kab ye nasha tha,
jis tarah roo-ba-ru koi hai abhi.

Qurbatein laakh khoobsurat hon,
dooriyon mein bhi dilkashi hai abhi.

Fasl-e gul mein bahaar pehla gulaab,
kisi ki zulfon mein taankti hai abhi.

Muddatein ho gayi ‘faraz magar,
woh jo deewaanagi ki thi hai abhi. !!

Aise Chup Hain Ki Ye Manzil Bhi Kadi Ho Jaise..

alone-sad-boy-man-sitting-thinking-depressed-ahmad-faraz-poetry-shayari

Aise chup hain ki ye manzil bhi kadi ho jaise,
tera milna bhi judaai ki ghadi ho jaise.

Apne hi saaye se gaam laraz jata hun,
raaste mein koi deewar khadi ho jaise.

Kitne nadaan hain tere bhulne wale ki tujhe,
yaad karne ke liye umar padi ho jaise.

Tere maathe ki shikan pehle bhi dekhi thi magar,
ye girah ab ke mere dil mein padi ho jaise.

Manzilen door bhi hain manzilen nazdeek bhi hain,
apne hi paaon mein zanjeer padi ho jaise.

Aaj dil khol ke roye hain toh yun khush hain faraz,
chand lamhon ki ye raahat bhi badi ho jaise. !!

Zindagi Se Yehi Gila Hai Mujhe..

romantic_couple_painting_girl seeing in boy's eyes_happy couple_cute_lovers_ahmad faraz_poetry_shayari_artpic_drawing_sketch

Zindagi se yehi gila hai mujhe,
tu bahut der se mila hai mujhe.

Tu mohabbat se koi chaal toh chal,
haar jaane ka hausla hai mujhe.

Dil dhadakta nahin tapakta hai,
kal jo khwaahish thi aabla hai mujhe.

Humsafar chahiye hujoom nahin,
ek musaafir bhi qaafila hai mujhe.

Kohkan ho ki qais ho ki ‘faraz
sab mein ek shakhs hi mila hai mujhe. !!

Chal Nikalti Hain Ghum-e Yaar Se Baaten Kya Kya..

Chal nikalti hain ghum-e yaar se baaten kya kya,
humne bhi ki dar-o deewar se baaten kya kya.

Baat ban aayi hai phir se ki mere baare mein,
uss ne poochhi mere ghum-khwaar se baaten kya kya.

Log labb-basta agar hon toh nikal aati hain,
chup ke pairaaya-e izhaar se baaten kya kya.

Kisi soudaai ka qissa kisi harjaai ki baat,
log le aate hain bazaar se baaten kya kya.

Humne bhi dasht-shanaasi ke bahaane ki hain,
haath mein haath liye pyaar se baaten kya kya.

Kis ko bikna tha magar khush hain ki iss heele se,
ho gayi apne khareedaar se baaten kya kya.

Hum hain khamosh ki majboor-e mohabbat the ‘faraz
warna mansoob hain sarkaar se baaten kya kya. !!

Aisa Hai Ki Sab Khwaab Musalsal Nahin Hote..

Aisa hai ki sab khwaab musalsal nahin hote,
jo aaj toh hote hain magar kal nahin hote.

Andar ki fazaaon ke karishme bhi ajab hain,
menh toot ke barse bhi toh baadal nahin hote.

Kuchh mushkilein aisi hain ki aasaan nahin hoti,
kuchh aise muamme hain kabhi hal nahin hote.

Shaaistagi-e ghum ke sabab aankhon ke sehraa,
namnaak toh ho jaate hain jal-thal nahin hote.

Kaisi hi talaatum hon magar qulzum-e jaan mein,
kuchh yaad jazeere hain ki ojhal nahin hote.

Ushshaaq ke maanind kayi ehal-e hawas bhi,
paagal toh nazar aate hain paagal nahin hote.

Sab khwaahishen poori hon ‘faraz aisa nahin hai,
jaise kayi ashaar mukammal nahin hote. !!

Agarche Zor Hawaon Ne Daal Rakha Hai..

Agarche zor hawaon ne daal rakha hai,
magar charaagh ne lau ko sambhaal rakha hai.

Mohabbaton mein toh milna hai ya ujad jana,
mizaaj-e ishq mein kab etidaal rakha hai.

Hawa mein nasha hi nasha fazaa mein rang hi rang,
ye kis ne pairhan apna uchhaal rakha hai.

Bhale dino ka bharosa hi kya rahen na rahen,
so maine rishta-e ghum ko bahaal rakha hai.

Hum aise sada-dilon ko woh dost ho ki khuda,
sabhi ne wada-e fardaa pe taal rakha hai.

Hisaab lutf-e hareefan kiya hai jab toh khula,
ki doston ne zyada khyaal rakha hai.

Bhari bahaar mein ek shaakh par khila hai gulaab,
ki jaise tune hatheli pe gaal rakha hai.

Faraz’ ishq ki duniya toh khoobsurat thi,
ye kisne fitna-e-hijr-o-visaal rakha hai. !!