Home / Nazms (page 4)

Nazms

Aur Chupke Chupke Ro Lena..

Jab seena ghum se bojhal ho
aur yaad kisi ki aati ho
tab kamre mein band ho jana
aur chupke chupke ro lena..
Jab aankhen baaghi ho jaayen
aur yaad mein meri bhar aayen
phir khud ko dhokha mat dena
aur chupke chupke ro lena..
Jab palken karb se moondi ho
aur sab samjhen tum sote ho
tab munh pe takiya rakh lena
aur chupke chupke ro lena..
Ye duniya zaalim duniya hai
ye baat bahut phailaayegi
tum saamne sab ke chup rehna
aur chupke chupke ro lena..
Jab baarish chehra dho daale
aur ashq bhi boonden lagti ho
woh lamha hargiz mat khona
aur chupke chupke ro lena …!!

Uth Meri Jaan Mere Saath Hi Chalna Hai Tujhe – Aurat by Kaifi Azmi

Uth meri jaan mere saath hi chalna hai tujhe
qalb-e-maahaul mein larzaan sharar-e-jung hain aaj
hausle waqt ke aur zeest ke yakrang hain aaj
aabgeenon mein tapaan walwala-e- sang hain aaj
husn aur ishq hum-aawaaz-o-hum-aahang hain aaj
jis mein jalta hun ussi aag mein jalna hai tujhe
uth meri jaan mere saath hi chalna hai tujhe..

Tere qadmon mein hai firdaus-e-tamaddun ki bahaar
teri nazron pe hai tehzeeb-o-taraqqi ka madaar
teri aaghosh hai gahwaara-e-nafs-o-kirdaar
taa-ba-kai gird tere wehm-o-tayyun ka hisaar
kaundh kar majlis-e-khalwat se nikalna hai tujhe
uth meri jaan mere saath hi chalna hai tujhe..

Tu ki bejaan khilonon se behal jaati hai
tapti saanson ki haraarat se pighal jaati hai
ban ke seemab har ek zarf mein dhal jaati hai
zeest ke aahni saanche mein bhi dhlna hai tujhe
uth meri jaan mere saath hi chalna hai tujhe..

Zindagi johad mein hai sabr ke qaabu mein nahin
nabz-e-hasti ka lahoo kaampte aansoo mein nahin
udne khulne mein hai nik.hat kham-e-gesu mein nahin
jannat ek aur hai jo mard ke pahlu mein nahin
uss ki aazaad ravish par bhi machalna hai tujhe
uth meri jaan mere saath hi chalna hai tujhe..

Goshe goshe mein sulagti hai chita tere liye
farz ka bhes badalti hai qazaa tere liye
qahar hai teri har narm adaa tere liye
zehar hi zehar hai duniya ki hawa tere liye
rut badal daal agar phoolna phalna hai tujhe
uth meri jaan mere saath hi chalna hai tujhe..

Qadr ab tak teri tareekh ne jaani hi nahin
tujh mein shole bhi hain bas ashk-fishaani hi nahin
tu haqeeqat bhi hai dilchasp kahaani hi nahin
teri hasti bhi hai ek cheez jawaani hi nahin
apni tareekh ka unwaan badalna hai tujhe
uth meri jaan mere saath hi chalna hai tujhe..

Tod kar rasm ke but band-e-qadaamat se nikal
zof-e-ishrat se nikal, weham-e-nazaakat se nikal
nafs ke kheenche hue halq-e-azmat se nikal
qaid ban jaye mohabbat toh mohabbat se nikal
raah ka khaar hi kya gul bhi kuchalna hai tujhe
uth meri jaan mere saath hi chalna hai tujhe..

Tod ye azm-shikan dagdaga-e-pand bhi tod
teri khaatir hai jo zanjeer woh saugandh bhi tod
tauq ye bhi zammurrad ka guluband bhi tod
tod paimana-e-mardaan-e-khirdmand bhi tod
ban ke toofaan chhalakna hai ubalna hai tujhe
uth meri jaan mere saath hi chalna hai tujhe..

Tu falaatun-o-arastu hai tu zehra parveen
tere qabze mein hai gardun, teri thokar mein zameen
haan utha jald utha paa-e-muqqadar se jabeen
main bhi rukne ka nahin waqt bhi rukne ka nahin
ladkhadaayegi kahan tak ki sambhalna hai tujhe
uth meri jaan mere saath hi chalna hai tujhe …!!

Kaifi Azmi

Kitaaben Jhaankti Hain Band Almaari Ke Sheeshon Se – Kitaben by Gulzar

Kitaaben jhaankti hain band almaari ke sheeshon se
badi hasrat se takti hain
maheenon ab mulaqaaten nahin hoti
jo shaamen un ki sohbat main kataa karti thi,ab aksar
guzar jaati hain computer ke pardon par
badi bechain rehti hain kitaaben
Unhe ab neend mein chalne ki aadat ho gayi hai
badi hasrat se takti hain
jo qadren woh sunaati thi
ki jin ke cell kabhi marte nahin the
woh qadren ab nazar aati nahin ghar mein
jo rishte woh sunaati thi
woh saare udhde udhde hain.

Koi safha palatTa hun toh ek siski nikalti hai
kayi lafzon ke maani gir pade hain
bina patton ke sookhe tund lagte hain woh sab alfaaz
jin par ab koi maani nahin ugte
bahut si istelaahen hain.

Jo mitti ke sakoron ki tarah bikhri padi hain
gilaason ne unhen matrook kar dala
zabaan par zaaiqa aata tha jo safhe palatne ka
ab ungli click karne se bas ek
jhapki guzarti hai
bahut kuchh tah-b-tah khulta chala jaata hai parde par.
Kitabon se jo zaati raabta tha kat gaya hai
kabhi seene pe rakh ke lett jaate the
kabhi godi mein lete the
kabhi ghutnon ko apne rahl ki soorat bana kar
neem sajde mein padha karte the, chhoote the jabhee se.

Woh saara ilm toh milta rahega aainda bhi
magar woh jo kitaabon mein mila karte the sookhe phool aur
mehke hue ruqe
kitaaben maangne, girne, uthaane ke bahaane rishte bante the
un ka kya hoga ?
woh shayad ab nahin honge. !!

Gulzar

Makaan – Poem by Kaifi Azmi

Aaj ki raat bahut garm hawa chalti hai
aaj ki raat na footpath pe neend aayegi
sab utho, main bi uthun tum bhi utho, tum bhi utho
koi khidki issi deewar mein khul jaayegi. !

Ye zameen tab bhi nigal lene pe aamaada thi
paanv jab tootTi shaakhon se utaare hum ne
un makaanon ko khabar hai na makeenon ko khabar
un dinon ki jo gufaaon mein guzaare hum ne. !

Haath dhalte gaye saanche mein toh thakte kaise
naqsh ke baad naye naqsh nikhaare hum ne
kii ye deewar buland, aur buland, aur buland
baam-o-dar aur, zara aur sanwaare hum ne. !

Aandhiyaan tod liya karti thi shamaaon ki laven
jad diye iss liye bijli ke sitaare hum ne
ban gaya qasr toh pehre pe koi baith gaya
so rahe khaak pe hum shorish-e-taameer liye. !

Apni nas nas mein liye mehnat-e-paiham ki thakan
band aankhon mein ussi qasr ki tasweer liye
din phighalta hai ussi tarah saron par ab tak
raat aankhon mein khatakti hai siyaah teer liye. !

Aaj ki raat bahut garm hawa chalti hai
aaj ki raat na footpath pe neend aayegi
sab utho, main bi uthun tum bhi utho, tum bhi utho
koi khidki issi deewar mein khul jaayegi. !!

Kaifi Azmi

Haath Pe Rakha Haath Achaanak..

Haath pe rakha haath achaanak
baat toh khwaab ki lagti hai..

Rang gulaabi mehka mehka
baat gulaab ki lagti hai..

Dekhen zyaada, bole kam kam
baat hisaab ki lagti hai..

Aadha chandaa, aadha baadal
Baat naqaab ki lagti hai..

Uska hijr bataao kaisa
baat azaab ki lagti hai..

Pal mein roothe, pal mein maane
baat janaab ki lagti hai..

Thoda thoda sa harjaai
baat toh aap ki lagti hai ..!

Keh Bhi De Ab Woh Sab Baaten.. [ Wisal Ki Khwahish ]

Keh bhi de ab woh sab baaten,
Jo dil mein posheeda hain.
Saare roop dikha de mujh ko,
Jo ab tak nadeeda hain.
Ek hi raat ke taare hain,
Hum donon uss ko jaante hain.
Doori aur majboori kya hai,
Uss ko bhi pahchaante hain.
Kyon phir donon mil nahin sakte ?
Kyon ye bandhan toota hai ?
Ya koi khot hai tere dil mein ?
Ya mera ghum jhootha hai …!

Munir Niazi