Home / Naseeb Poetry

Naseeb Poetry

Apni Marzi Se Kahan Apne Safar Ke Hum Hain..

Apni marzi se kahan apne safar ke hum hain,
rukh hawaaon ka jidhar ka hai udhar ke hum hain.

Pehle har cheez thi apni magar ab lagta hai,
apne hi ghar mein kisi doosre ghar ke hum hain.

Waqt ke saath hai mitti ka safar sadiyon se,
kis ko maloom kahan ke hain kidhar ke hum hain.

Chalte rehte hain ki chalna hai musaafir ka naseeb,
sochte rehte hain kis raahguzar ke hum hain.

Hum wahan hain jahan kuchh bhi nahin rasta na dayaar,
apne hi khoye hue shaam-o-shehar ke hum nahin.

Gintiyon mein hi gine jaate hain har daur mein hum,
har qalamkaar ki benaam khabar ke hum hain. !!

Nida Fazli

Beemar Ko Marz Ki Dawa Deni Chahiye..

Beemar ko marz ki dawa deni chahiye,
main peena chahta hun pila deni chahiye.

Allaah barkaton se nawaazega ishq mein,
hai jitni poonji paas laga deni chahiye.

Dil bhi kisi faqeer ke huzre se kam nahin,
ye duniya yahin pe laa ke chhupa deni chahiye.

Main khud bhi karna chahta hun apna saamna,
tujh ko bhi ab naqaab utha deni chahiye.

Main phool hun toh phool ko guldaan ho naseeb,
main aag hun toh aag bujha deni chahiye.

Main taaj hun toh taaj ko sar pe sajaayen log,
main khaak hun toh khaak udaa deni chahiye.

Maine jabr hun toh jabr ki taaiid band ho,
main sabr hun toh mujh ko dua deni chahiye.

Main khwaab hun toh khwaab se chaunkaaiye mujhe,
main neend hun toh neend udaa deni chahiye.

Sach baat kaun hai jo sar-e-aam keh sake,
main keh raha hun mujh ko saza deni chahiye. !!

Rahat Indori

Masjidon Ke Sehan Tak Jana Bahut Dushwaar Tha..

Masjidon ke sehan tak jana bahut dushwaar tha,
der se nikla toh mere raaste mein daar tha.

Dekhte hi dekhte shehron ki raunaq ban gaya,
kal yahi chehra humare aainon par baar tha.

Apni qismat mein likhi thi dhoop ki naraazgi,
saaya-e-deewar tha lekin pas-e-deewar tha.

Sab ke dukh sukh uss ke chehre par likhe paaye gaye,
aadmi kya tha humare shehar ka akhbaar tha.

Ab mohalle bhar ke darwaazon pe dastak hai naseeb,
ek zamana tha ki jab main bhi bahut khuddar tha. !!

Rahat Indori

Hoti Hai Tere Naam Se Wehshat Kabhi Kabhi..

Hoti hai tere naam se wehshat kabhi kabhi,
barham hui hai yun bhi tabiyat kabhi kabhi.

Aye dil kise naseeb ye taufeeq-e-iztiraab,
milti hai zindagi mein ye raahat kabhi kabhi.

Tere karam se hai aye alam-e-husn-aafreen,
dil ban gaya hai dost ki khalwat kabhi kabhi.

Josh-e-junoon mein dard ki tughyaniyon ke saath,
ashkon mein dhal gayi teri soorat kabhi kabhi.

Tere qareeb reh ke bhi dil mutmain na tha,
guzri hai mujh pe ye bhi qayaamat kabhi kabhi.

Kuchh apna hosh tha na tumhara khyal tha,
yun bhi guzar gayi shab-e-furqat kabhi kabhi.

Aye dost hum ne tark-e-mohabbat ke bawajood,
mehsoos ki hai teri zaroorat kabhi kabhi. !!

Nasir Kazmi

Meri Nazar Ke Saleeqe Mein Kya Nahin Aata..

Meri nazar ke saleeqe mein kya nahin aata,
bas ek teri hi taraf dekhna nahin aata.

Akele chalna toh mera naseeb tha ki mujhe,
kisi ke saath safar baantna nahin aata.

Udhar toh jaate hain raaste tamaam hone ko,
idhar se ho ke koi raasta nahin aata.

Jagaana aata hai uss ko kayi tareeqon se,
gharon pe dastaken dene khuda nahin aata.

Yahan pe tum hi nahin aas paas aur bhi hain,
par uss tarah se tumhe sochna nahin aata.

Pade raho yun hi sahme hue diyon ki tarah,
agar hawaaon ke par baandhna nahin aata. !!

Wasim Barelvi

Woh Mujhe Chhod Kar Yun Aage Badhaa Jaata Hai..

Woh mujhe chhod kar yun aage badhaa jaata hai,
jaise ab mera safar khatm hua jaata hai.

Baat rone ki lage aur hansa jaata hai,
yun bhi halaat se samjhauta kiya jaata hai.

Dil ke rishte hi gira dete hain deewaaren bhi,
dil ke rishton hi ko deewaar keha jaata hai.

Ye meri aakhiri shab toh nahin mayykhane mein?
kaanpte haathon se kyon jaam diya jaata hai.

Kis adaalat mein suna jaayega daawa un ka,
jin umeedon ka gala ghont diya jaata hai.

Faasle jis ki rafaaqat ka muqaddar thehre,
uss musaafir ka kahaan saath diya jaata hai.

Raat aadhi se zyada hi gayi hogi ‘waseem
aao ghar laut lein, *naawaqt hua jaata hai. !!

* [ Naawaqat=delay, der ]

Wasim Barelvi

Kuchh Iss Tarah Woh Meri Zindagi Mein Aaya Tha..

Kuchh iss tarah woh meri zindagi mein aaya tha,
ki mera hote hue bhi, bas ek saaya tha.

Hawaa mein udne ki dhun ne ye din dikhaaya tha,
udaan meri thi, lekin safar paraaya tha.

Ye kaun raah dikha kar chala gaya mujh ko,
main zindagi mein bhala kis ke kaam aaya tha.

Main apne waade pe qaayam na rah saka warna,
woh thodi door ja kar toh laut aaya tha.

Na ab woh ghar hai, na uske log yaad ‘wasim
na jaane uss ne kahan se mujhe churaaya tha. !!

Wasim Barelvi

Ajeeb Khwahish Hai Shehar Walon Se Chhup Chhupa Kar Kitaab Likhun..

alone_sad_girl_reading_book_noshi_gilani_shayari_poetry_ghazal

Ajeeb khwahish hai shehar walon se chhup chhupa kar kitaab likhun,
tumhare naam apni zindagi ki kitaab ka intisaab likhun.

Woh lamha kitna ajeeb tha jab humari aankhen gale mili thi,
main kis tarah ab muhabbaton ki shikastagi ke azaab likhun.

Tumhi ne mere ujaad raaston pe khwahishon ke diye jalaaye,
tumhi ne chaha tha khushk honthon se chaahaton ke gulaab likhun.

Kabhi woh din the ki neend aankhon ki sarhadon se pare pare thi,
magar main ab jab bhi sona chahun tumhari yaadon ke khwaab likhun.

Main tanha ladki diyaar-e shab mein jalaaun sach ke diye kahan tak,
siyaahkaron ki saltanat mein main kis tarah aaftaab likhun.

Qayadaton ke junoon mein jin ke qadam lahoo se range hue hain,
ye mere bas mein nahin hai logo ki unko izzat-maab likhun.

Yehi bahut hai ki inn labbon ko sada se mehroom kar ke rakh dun,
magar ye kaisi musalahat hai samundaron ko saraab likhun .!!

-> Noshi Gilani

Koi Mujh Ko Mera Bharpoor Sarapa La De..

Koi mujh ko mera bharpoor sarapa la de,
mere baazu, meri aankhein, mera chehra la de.

Aisa dariya jo kisi aur samundar mein gire,
iss se behtar hai ki mujh ko mera sehra la de.

Kuchh nahin chahiye tujh se aye meri umar-e rawaan,
mera bachpan, mere jugnu, meri gudiya la de.

Naya mausam meri beenaai ko tasleem nahin,
meri aankhon ko wohi khwaab puraana la de.

Jis ki aankhein mujhe andar se bhi padh sakti hon,
koi chehra toh mere shehar mein aisa la de.

Kashti-e jaan toh bhanwar mein hai kayi barson se,
aye khuda! ab toh dubo de ya kinaara la de. !!

-> Noshi Gilani

Har Zulm Tera Yaad Hai Bhoola Toh Nahin Hun..

Boy-Girl-on-bridge-rude-in-evening-ghazal-shayari-poetry

Har zulm tera yaad hai bhoola toh nahin hun,
aye wada-e faramosh main tujh sa toh nahin hun.

Saahil pe khade ho tumhe kya ghum chale jana,
main doob raha hun abhi dooba toh nahin hun.

Chup chaap sahi maslehatan waqt ke haathon,
majboor sahi waqt se haara toh nahin hun.

Muztar kyon mujhe dekhta rehta hai zamana,
deewana sahi unka tamasha toh nahin hun …!!

Poet: Altaf Muztar