Home / Mulaqaat Shayari

Mulaqaat Shayari

Aisi Hi Sard Shaam Thi Woh Bhi..

Aisi hi sard shaam thi woh bhi,
jab woh mehndi rachaaye haathon mein,
apni aahat ke khauf se larazaan,
soorkh aanchal mein munh chhipaaye hue,
apne khat mujh se lene aayi thi..

Uss ki sehmi hui nigaahon mein,
kitni khamosh iltizaayen thi..
uss ke chehre ki zard rangat mein,
kitni majburiyon ke saaye the..
mere haathon se khat pakadte hi,
jaane kya soch kar achaanak woh,
mera shaana pakad kar roi thi..
uss ke yaqoot rang honthon ke,
kampkapaate hue kinaaron par,
sat beete hue zamaane the,
saikadon ankahe fasaane the..

Sard shaamon mein der tak aksar,
jab ye manzar dikhai deta hai..
ek lamha,  hinaai haathon se..
mujh ko apni taraf bulata hai..
humnashin rooth kar na ja mujh se ..!!

Amjad Islam Amjad

Yaad Aata Hai Roz o Shab Koi..

Yaad aata hai roz-o-shab koi,
hum se rootha hai besabab koi.

Lab-e-joo chhaanv mein darakhton ki,
woh mulaqaat thi ajab koi.

Jab tujhe pehli baar dekha tha,
woh bhi tha mausam-e-tarab koi.

Kuchh khabar le ki teri mehfil se,
door baitha hai jaan-e-balab koi.

Na ghum-e-zindagi na dard-e-firaaq,
dil mein yunhi si hai talab koi.

Yaad aati hain door ki baaten,
pyaar se dekhta hai jab koi.

Chot khaayi hai baarha lekin,
aaj toh dard hai ajab koi.

Jin ko mitna tha mit chuke ‘nasir
un ko ruswa kare na ab koi. !!

Nasir Kazmi

Aaj Bahut Din Baad Suni Hai Barish Ki Aawaz..

Girl_and_boy_couple_in_rain_shahid_sonam_kapoor_in_mausam_rain_scene_poetry_shayari

Aaj bahut din baad suni hai barish ki aawaz
Aaj bahut din baad kisi manzar ne rasta roka hai
Rim jhim ka malboos pehan kar yaad kisi ki aayi hai
Aaj bahut din baad achanak aankh yun hi bhar aayi hai
Aankh aur manzar ki wusat mein chaaron jaanib barish hai
Aur barish mein door kahin ek ghar hai.

Jis mein ek ek eent par tere mere khwaab likhe hain
Aur iss ghar ko jaane wali kuchh galiyan hain
Jis mein hum donon ke saaye tanha tanha bheeg rahe hain
Darwaaze par Qufl* pada hai aur dareeche soone hain
Deewaron pe jami hui kaayi mein chhup kar
Mausam hum ko dekh rahe hain.

Kitne baadal hum donon ki aankh se ojhal
Baras baras kar guzar chuke hain
Ek kami si ek nami si
Chaaron jaanib phail rahi hai
Kayi zamaane ek hi pal mein
Baham mil kar bheeg rahe hain
Andar yaadein sookh rahi hain
Baahar manzar bheeg rahe hain …!!

*[Qufl= a lock, a bolt

Muddat Mein Woh Phir Taaza Mulaqaat Ka Aalam..

Muddat mein woh phir taza mulaqaat ka aalam,
khamosh adaaon mein woh jazbaat ka aalam.

Allah re woh shiddat-e jazbaat ka aalam,
kuchh keh ke woh bhooli hui har baat ka aalam.

Aariz se dhalakte hue shabnam ke woh qatre,
aankhon se jhalakta hua barsaat ka aalam.

Woh nazaron hi nazaron mein sawaalaat ki duniya,
woh ankhon hi ankhon mein jawaabaat ka aalam. !!

Jigar Moradabadi

Kal Humesha Ki Tarah Uss Ne Keha Ye Phone Par..

Kal humesha ki tarah uss ne keha ye phone par..
“Main bahut masroof hun mujh ko bahut se kaam hain
Iss liye tum aao milne main toh aa sakti nahin”.
Har riwayat tod kar iss baar maine keh diya..
“Tum jo ho masroof toh main bhi bahut masroof hun..
Tum jo ho mash-hoor toh main bhi bahut maroof hun..
Tum agar ghumgeen ho main bhi bahut ranjoor hun..
Tum thakan se choor toh main bhi thakan se choor hun..
Jaan-e-man hai waqt mera bhi bahut hi keemati..
Kuchh puraane doston ne milne aana hai abhi..
Main bhi ab faarigh nahin, mujh ko bhi laakhon kaam hain..
Warna kehne ko toh sab lamhe tumhare naam hain..
Meri aankhen bhi bahut bojhal hain sona hai mujhe..
Ratjaggon ke baad ab neendon mein khona hai mujhe..
Main lahoo apni anaa’on ka baha sakta nahin..
Tum nahin aati toh milne main bhi aa sakta nahin”.
Uss ko ye keh ke ‘wasi maine reciver rakh diya,
Aur phir apni anaa ke paaon pe sar rakh diya …!!

Wasi Shah