Home / Ghazals (page 60)

Ghazals

Poetry, Shayaries, and poems best collections from around the World. Best, memorable, and most Popular Ghazals,Geets, songs, poems, poetry of the All time Classics.

Udaas Raaton Mein Tezz Kaafi Ki Talkhiyon Mein..

Udaas raaton mein tezz kaafi ki talkhiyon mein,
woh kuchh zyada hi yaad aata hai sardiyon mein.

Mujhe ijaazat nahin hai uss ko pukaarne ki,
jo goonjta hai lahoo mein, seene ki dhadkanon mein.

Woh bachpanaa jo udaas raahon mein kho gaya tha,
main dhoondta hun usey tumhaari sharaaraton mein.

Usey dilaase toh de raha hun magar ye sach hai,
kahin koi khauf badh raha hai tasalliyon mein.

Tum apni poron se jaane kya likh gaye the jaanam,
charaagh roshan hain ab bhi meri hatheliyon mein.

Jo tu nahin hai toh ye mukammal na ho sakengi,
teri yehi ahmiyat hai meri kahaaniyon mein.

Mujhe yaqeen hai woh thaam lega bharam rakhega,
ye maan hai toh diye jalaaye hain aandhiyon mein.

Har ek mausam mein roshni si bikherte hain,
tumhaare ghum ke charaagh meri udaasiyon mein. !!

Wasi Shah

Udaas Raaton Mein Tezz Kaafi Ki Talkhiyon Mein..
5 (100%) 4 votes

Mohabbat Mein Tumhe Aansoo Bahaana Nahin Aaya..

Mohabbat mein tumhe aansoo bahaana nahin aaya,
banaaras mein rahe aur paan khana nahin aaya.

Na jaane log kaise mom kar dete hain patthar ko,
humein toh aap ko bhi gudgudana nahin aaya.

Shikaari kuchh bhi ho itna sitam achchha nahin hota,
abhi toh chonch mein chidiya ke daana tak nahin aaya.

Ye kaise raaste se le ke tum mujh ko chale aaye,
kahan ka maikada, ek chaaikhana tak nahin aaya. !!

Munawwar Rana

Mohabbat Mein Tumhe Aansoo Bahaana Nahin Aaya..
5 (100%) 3 votes

Maula Ye Tamanna Hai Ki Jab Jaan Se Jaaun..

Maula ye tamanna hai ki jab jaan se jaaun,
jis shaan se aaya hun usii shaan se jaaun.

Bachchon ki tarha pedd ki shaakhon se main kudoon,
chidiyon ki tarha udd ke main khalihaan se jaaun.

Har lafz mehakne lage likha hua mera,
main lipta hua yaadon ke lobaan se jaaun.

Kya sookhe hue phool ki qismat ka bharosa,
maloom nahin kab tere guldaan se jaaun.

Darbaar mein tere mujhe kya rokega koi,
laanat hai agar poochh ke darbaan se jaaun.

Mujh mein koi veeraana bhi aabaad hai shayed,
har saans ne poochha tha biyabaan se jaaun.

Zinda mujhe dekhegi toh maa cheekh uthegi,
kya zakhm liye peeth pe maidaan se jaaun. !!

Munawwar Rana 

Maula Ye Tamanna Hai Ki Jab Jaan Se Jaaun..
4.3 (86.67%) 6 votes

Ab Apni Anaa Se Mujhe Dar Lagne Laga Hai..

Ab apni anaa se mujhe dar lagne laga hai,
sehra mein na jaane kahin sar lagne laga hai.

Aage ka safar sirf meri rooh karegi,
ab jism bhi samaan-e safar karne laga hai.

Lagta hai ki dehleez par aa pahunchi qayaamat,
ek bhai ko ek bhai se dar lagne laga hai.

Waise toh koi cheez nahin badli hai lekin,
tum jab se gaye ho mujhe dar lagne laga hai.

Aye sehra-navardi mujhe aabadi se le chal,
kuchh roz se zindaan mujhe ghar lagne laga hai.

Unko nahin maloom ki ghar hote hain kaise,
bachchon ko toh footpath hi ghar lagne laga hai. !!

Munawwar Rana

Ab Apni Anaa Se Mujhe Dar Lagne Laga Hai..
5 (100%) 1 vote

Manzar Tumhare Husn Ka Sab Ki Nazar Mein Hai..

Manzar tumhare husn ka sab ki nazar mein hai,
ab mere aitbaar ki kashti bhanwar mein hai.

Tanha mujhe kabhi na samajhna mere hareef,
ek bhai mar chuka hai magar ek ghar mein hai.

Woh toh likha ke laayi hai qismat mein jaagna,
maa kaise so sakegi ki beta safar mein hai.

Suni padi hui hain behan ki hatheliyan,
phal pak chuka hai aur abhi tak shajar mein hai.

Pardesh se watan ka safar bhi ajeeb hai,
main ghar pahunch gaya hun badan rahguzar mein hai.

Kal uss ke dil pe kis ka ho qabza khabar nahin,
ab tak toh ye ilaaqa humaare asar mein hai. !!

Munawwar Rana

Manzar Tumhare Husn Ka Sab Ki Nazar Mein Hai..
5 (100%) 2 votes

Hungama Hai Kyon Barpa Thodi Si Jo Pee Li Hai..

Hungama hai kyon barpa thodi si jo pee li hai
daaka toh nahin daala chori toh nahin ki hai.

Na-tajraba-kaari se waaiz ki ye hain baaten
iss rang ko kya jaane puchho toh kabhi pee hai.

Uss mayy se nahin matlab dil jis se hai begaana
maqsood hai uss mayy se dil hi mein jo khinchti hai.

Waan dil mein ki sadme do,  yaan jee mein ki sab sah lo
un ka bhi ajab dil hai, mera bhi ajab jee hai.

Har zarra chamakta hai anawaar-e ilaahi se
har saans ye kehti hai hum hain toh khuda bhi hai.

Sooraj mein lage dhabba fitarat ke karishme hain
buut hum ko kahen kaafir allaah ki marzi hai.

Taleem ka shor aisa tehzeeb ka ghul itna
barkat jo nahin hoti neeyat ki kharaabi hai.

Sach kehte hain shekh ‘akbar taa-at-ehaq laazim
haan tark-e mayy-o shaahid ye un ki buzurgee hai. !!

Akbar Allahabadi

Hungama Hai Kyon Barpa Thodi Si Jo Pee Li Hai..
5 (100%) 3 votes

Duniya Mein Hun Duniya Ka Talabgaar Nahin Hun..

Duniya mein hun, duniya ka talabgaar nahin hun
bazaar se guzra hun, kharidaar nahin hun.

Zinda hun magar zeest ki lazzat nahi baaqi
har-chand ki hun hosh mein, hoshiyar nahin hun.

Iss khana-e hasti se guzar jaaunga be-laus
saaya hun faqat naqsh-ba-deewar nahin hun.

Afasurda hun ibaarat se dawaa ki nahin haajat
ghum ka mujhe ye zauf hai beemaar nahin hun.

Woh gul hun khizan ne jise barbaad kiya hai
uljhun kisi daaman se main woh khaar nahin hun.

Ya rabb mujhe mahfooz rakh uss buut ke sitam se
main uss ki inaayat ka talabgaar nahin hun.

Go daava-e taqwaa nahin dargaah-e khuda mein
buut jis se hon khush aisa gunahgaar nahin hun.

Afsurdagi-o zauf ki kuchh had nahin ‘akbar
kaafir ke muqaabil mein bhi deen-daar nahin hun. !!

Akbar Allahabadi

Duniya Mein Hun Duniya Ka Talabgaar Nahin Hun..
5 (100%) 3 votes