Home / Ghazals (page 50)

Ghazals

Poetry, Shayaries, and poems best collections from around the World. Best, memorable, and most Popular Ghazals,Geets, songs, poems, poetry of the All time Classics.

Zinda Rahen Toh Kya Hai Jo Mar Jaayen Hum Toh Kya..

Zinda rahen toh kya hai jo mar jayen hum toh kya,
duniya se khamoshi se guzar jaayen hum toh kya.

Hasti hi apni kya hai zamaane ke saamne,
ek khwaab hain jahaan mein bikhar jaayen hum toh kya.

Ab kaun muntazir hai humare liye wahan,
shaam aa gayi hai laut ke ghar jaayen hum toh kya.

Dil ki khalish toh saath rahegi tamaam umar,
dariya-e ghum ke paar utar jaayen hum toh kya. !!

Munir Niazi

Zinda Rahen Toh Kya Hai Jo Mar Jaayen Hum Toh Kya..
5 (100%) 1 vote[s]

Aa Gayi Yaad Shaam Dhalte Hi..

Aa gayi yaad shaam dhalte hi,
bujh gaya dil chiraagh jalte hi.

Khul gaye shehar-e-ghum ke darwaaze,
ek zaraa si hawaa ke chalte hi.

Kaun tha tu ki phir na dekha tujhe,
mit gaya khwaab aankh malte hi.

Tu bhi jaise badal sa jata hai,
aks-e-deewaar ke badalte hi.

Khoon sa lag gaya hai haathon mein,
chadh gaya zehar gul masalte hi. !!

Munir Niazi

Aa Gayi Yaad Shaam Dhalte Hi..
5 (100%) 2 vote[s]

Meri Saari Zindagi Ko Be-samar Uss Ne Kiya..

Meri saari zindagi ko be-samar uss ne kiya,
umar meri thi magar uss ko basar uss ne kiya.

Main bahut kamzor tha iss mulk mein hijrat ke baad,
par mujhe iss mulk mein kamzor-tar uss ne kiya.

Rehbar mera bana gumraah karne ke liye,
mujh ko seedhe raaste se dar-ba-dar uss ne kiya.

Shehar mein woh mo’tabar meri gawaahi se hua,
phir mujhe iss shehar mein na-mo’tabar uss ne kiya.

Shehar ko barbaad kar ke rakh diya uss ne ‘munir
shehar par ye zulm mere naam par uss ne kiya. !!

Munir Niazi

Meri Saari Zindagi Ko Be-samar Uss Ne Kiya..
5 (100%) 2 vote[s]

Bechain Bahut Phirna Ghabraaye Hue Rahna..

Bechain bahut phirna ghabraaye hue rahna,
ek aag si jazbon ki dahakaaye hue rahna.

Chhalkaaye hue chalana khushboo lab-e-laali ki,
ek baagh sa saath apne mehkaaye hue rahna.

Uss husn ka shewa hai jab ishq nazar aaye,
parde mein chale jana, sharmaaye hue rahna.

Ek shaam si kar rakhna kaajal ke karishme se,
ek chaand sa aankhon mein chamkaaye hue rahna.

Aadat hi bana li hai tum ne toh ‘munir apni
jis shehar mein bhi rahna uktaaye hue rahna. !!

Munir Niazi

Bechain Bahut Phirna Ghabraaye Hue Rahna..
5 (100%) 2 vote[s]

Saaqi Par Ilzaam Na Aaye..

Saaqi par ilzaam na aaye,
chaahe tujh tak jaam na aaye.

Tere siwa jo ki ho mohabbat,
meri jawaani kaam na aaye.

Jin ke liye mar bhi gaye hum,
woh chal kar do gaam na aaye.

Ishq ka sauda itna garaan hai,
inhen hum se kaam na aaye.

Maikhaane mein sab hi toh aaye,
lekin ‘jigar ka naam na aaye. !!

Jigar Moradabadi

Saaqi Par Ilzaam Na Aaye..
5 (100%) 2 vote[s]

Saaqi Ki Har Nigaah Pe Bal Kha Ke Pee Gaya..

Saaqi ki har nigaah pe bal kha ke pee gaya,
leharon se khelta hua lehra ke pee gaya.

Bekaifiyon ke kaif se ghabra ke pee gaya,
tauba ko tod taad ke tharra ke pee gaya.

Zahid ye meri shokhi-e-rindana dekhna,
rahmat ko baaton baaton mein behla ke pee gaya.

Sarmasti-e-azal mujhe jab yaad aa gayi,
duniya-e-aitbaar ko thukra ke pee gaya.

Aye rahmat-e-tamaam meri har khata muaaf,
main inteha-e-shauq mein ghabra ke pee gaya.

Peeta baghair izan ye kab thi meri majaal,
dar-parda chashm-e-yaar ki sheh pa ke pee gaya.

Uss jaan-e-maikada ki qasam baarha ‘Jigar
kul alam-e-bisaat pe main chhaa ke pee gaya. !!

Jigar Moradabadi

Saaqi Ki Har Nigaah Pe Bal Kha Ke Pee Gaya..
5 (100%) 2 vote[s]

Ishq Ko Be-naqaab Hona Tha..

Ishq ko be-naqaab hona tha,
aap apna jawaab hona tha.

Mast-e-jaam-e-sharaab hona tha,
bekhud-e-iztiraab hona tha.

Teri aankhon ka kuchh qusoor nahin,
haan mujhi ko kharaab hona tha.

Aao mil jaao muskura ke gale,
ho chuka jo itaab hona tha.

Koocha-e-ishq mein nikal aaya,
jis ko khana-kharaab hona tha.

Mast-e-jaam-e-sharaab khaak hote,
garq-e-jaam-e-sharaab hona tha.

Dil ki jis par hain naqsh-e-ranga-rang
uss ko saada kitaab hona tha.

Hum ne nakaamiyon ko dhoond liya,
aakhirash kaamyaab hona tha.

Haaye woh lamha-e-sukoon ki jise,
mahshar-e-iztiraab hona tha.

Nigaah-e-yaar khud tadap uthti,
shart-e-awwal kharaab hona tha.

Kyon na hota sitam bhi bepaayan,
karam-e-behisaab hona tha.

Kyon nazar hairaton mein doob gayi,
mauj-e-sad-iztiraab hona tha.

Ho chuka roz-e-awwali hi ‘jigar
jis ko jitna kharaab hona tha. !!

Jigar Moradabadi

Ishq Ko Be-naqaab Hona Tha..
5 (100%) 1 vote[s]