Home / Ghazals (page 20)

Ghazals

Poetry, Shayaries, and poems best collections from around the World. Best, memorable, and most Popular Ghazals,Geets, songs, poems, poetry of the All time Classics.

Har Ek Baat Pe Kehte Ho Tum Ki Tu Kya Hai..

Mirza Ghalib Poetry

Har ek baat pe kehte ho tum ki tu kya hai,
tumhin kaho ki ye andaaz-e-guftgoo kya hai.

Na shole mein ye karishma na barq mein ye adaa,
koi bataao ki woh shokh-e-tund-khoo kya hai.

Ye rashk hai ki woh hota hai hum-sukhan tum se,
wagarna khauf-e-bad-aamozi-e-adoo kya hai.

Chipak raha hai badan par lahoo se pairaahan,
humari jeb ko ab haajat-e-rafoo kya hai.

Jalaa hai jism jahan dil bhi jal gaya hoga,
kuredate ho jo ab raakh justjoo kya hai.

Ragon mein daudte phirne ke hum nahin qaayal,
jab aankh se hi na tapka toh phir lahoo kya hai.

Woh cheez jis ke liye hum ko ho bahisht azeez,
siwaaye baada-e-gulfaam-e-mushk-boo kya hai.

Piun sharaab agar khum bhi dekh lun do chaar,
ye sheesha-o-qadah-o-kooza-o-suboo kya hai.

Rahi na taaqat-e-guftaar aur agar ho bhi,
toh kis ummeed pe kahiye ki aarzoo kya hai.

Bana hai shaah ka musaahib phire hai itraata,
wagarna shehar mein ‘ghalib’ ki aabroo kya hai. !!

– Click here for Mirza Ghalib Poetry collection

Daayam Pada Hua Tere Dar Par Nahin Hun Main..

Mirza Ghalib Poetry

Daayam pada hua tere dar par nahin hun main,
khaak aisi zindagi pe ki patthar nahin hun main.

Kyon gardish-e-mudaam se ghabra na jaaye dil,
insaan hun pyaala-o-saaghar nahin hun main.

Yaa rab zamana mujh ko mitaata hai kis liye,
lauh-e-jahaan pe harf-e-mukarrar nahin hun main.

Had chaahiye sazaa mein uqoobat ke waaste,
aakhir gunaahgaar hun kaafir nahin hun main.

Kis waaste azeez nahin jaante mujhe,
laal-o-zumurrud-o-zar-o-gauhar nahin hun main.

Rakhte ho tum kadam meri aankhon se kyon daregh,
rutbe mein mehr-o-maah se kamtar nahin hun main.

Karte ho mujh ko mana-e-kadam-bos kis liye,
kya aasmaan ke bhi baraabar nahin hun main.

Ghalib’ wazeefa-khwar ho do shaah ko dua,
woh din gaye ki kehte the naukar nahin hun main. !!

– Click here for Mirza Ghalib Poetry collection

Ghar Jab Bana Liya Tere Dar Par Kahe Baghair..

Mirza Ghalib Poetry

Ghar jab bana liya tere dar par kahe baghair,
jaanega ab bhi tu na mera ghar kahe baghair.

Kehte hain jab rahi na mujhe taaqat-e-sukhan,
jaanu kisi ke dil ki main kyonkar kahe baghair.

Kaam uss se aa pada hai ki jis ka jahaan mein,
lewe na koi naam sitamagar kahe baghair.

Jee mein hi kuchh nahin hai humare wagarna hum,
sar jaaye ya rahe na rahen par kahe baghair.

Chhodunga main na uss but-e-kaafir ka poojna,
chhode na khalq go mujhe kaafir kahe beghair.

Maqsad hai naaz-o-ghamza wale guftagu mein kaam
chalta nahin hai dashna-o-khanjar kahe beghair.

Har chand ho mushaahida-e-haq ki guftagu,
banti nahin hai baada-o-saaghar kahe beghair.

Behra hun main to chahiye doona ho iltefaat,
sunta nahin hun baat muqarrar kahe beghair.

Ghalib’ na kar huzoor mein tu baar baar arz,
zaahir hai tera haal sab un par kahe beghair. !!

– Click here for Mirza Ghalib Poetry collection

Aa Ki Meri Jaan Ko Qaraar Nahin Hai..

Mirza Ghalib Poetry

Aa ki meri jaan ko qaraar nahin hai,
taaqat-e-bedaad-e-intezaar nahin hai.

Dete hain jannat hayaat-e-dahar ke badle,
nashsha ba-andaaza-e-khummaar nahin hai.

Giriya nikaale hai teri bazm se mujh ko,
haaye ki rone pe ikhtiyaar nahin hai.

Hum se abas hai gumaan-e-ranjish-e-khaatir,
khaak mein ushshaaq ki ghubaar nahin hai.

Dil se utha lutf-e-jalwa-haa-e-maani,
ghair-e-gul aaina-e-bahaar nahin hai.

Qatl ka mere kiya hai ahad toh baare,
waae ! agar ahad ustuwaar nahin hai.

Tune kasam mai-kashi ki khaai hai ‘ghalib’
teri kasam ka kuchh aitbaar nahin hai. !!

– Click here for Mirza Ghalib Poetry collection

Aah Ko Chaahiye Ek Umar Asar Hone Tak..

Mirza Ghalib Poetry

Aah ko chaahiye ek umar asar hone tak,
kaun jeeta hai teri zulf ke sar hone tak.

Daam-e-har mauj mein hai halqa-e-sad-kaam-e-nahang,
dekhen kya guzre hai qatre pe guhar hone tak.

Aashiqi sabr-talab aur tamanna betaab,
dil ka kya rang karun khoon-e jigar hone tak.

Hum ne maana ki taghaful na karoge lekin,
khaak ho jaayenge hum tum ko khabar hone tak.

Partav-e-khur se hai shabnam ko fanaa ki taaleem,
main bhi hun ek inaayat ki nazar hone tak.

Yak nazar besh nahin fursat-e hasti gaafil,
garmi-e bazm hai ek raqs-e sharar hone tak.

Ghum-e hasti ka asad kis se ho juz marg ilaaj,
shama har rang mein jalti hai sehar hone tak. !!

– Click here for Mirza Ghalib Poetry collection

Mohabbat Ki Rangeeniyaan Chhod Aaye..

Habib Jalib Poetry

Mohabbat ki rangeeniyaan chhod aaye,
tere shehar main ek jahaan chhod aaye.

Pahaadon ki woh mast-o-shadaab waadi,
jahan hum dil-e-naghma khawan chhod aaye.

Woh sabza woh dariya woh pedon ke saaye,
woh geeton bhari bastiyaan chhod aaye.

Haseen panghaton ka woh chaandi sa paani,
woh barkha ki rut woh saamaan chhod aaye.

Bahut se mile humsafar raste mein,
nahin yaad kis ko kahan chhod aaye.

Bahut door hum aa gaye uss gali se,
bahut door woh aastaan chhod aaye.

Bahut meharbaan thi woh gul-posh raahen,
magar hum unhen meharbaan chhod aaye.

Bhagolon ki soorat yahan phir rahe hain,
nasheman sar-e-gulistaan chhod aaye.

Ye aijaz hai husn-e-aawaargi ka,
jahan bhi gaye daastaan chhod aaye.

Chale aaye un rahguzaaron se ‘jalib
magar hum wahan qalb-o-jaan chhod aaye. !!

Click Here For Habib Jalib Poetry Collection

Phir Dil Se Aa Rahi Hai Sada Us Gali Mein Chal..

Habib Jalib Poetry

Phir dil se aa rahi hai sadaa uss gali mein chal,
shayad mile ghazal ka pata uss gali mein chal.

Kab se nahin hua hai koi sher kaam ka,
ye sher ki nahin hai faza uss gali mein chal.

Woh baam-o-dar woh log woh ruswaaiyon ke zakhm,
hain sab ke sab azeez juda uss gali mein chal.

Uss phool ke baghair bahut jee udaas hai,
mujh ko bhi saath le ke saba uss gali mein chal.

Duniya toh chaahti hai yunhi faasle rahen,
duniya ke mashwaron pe na jaa uss gali mein chal.

Benoor-o-be-asar hai yahan ki sada-e-saaz,
tha uss sukoot mein bhi maza uss gali mein chal.

Jalib’pukaarti hain woh shola-nawaaiyaan,
ye sard rut ye sard hawa uss gali mein chal. !!

– Click Here For Habib Jalib Poetry Collection