Home / Love Shayari (page 11)

Love Shayari

Bana Ke Banjar Ye Dil Ki Basti Ujaad Jaate Hain Soch Lena..

rejected, sad girl

Bana Ke Banjar Ye Dil Ki Basti Ujaad Jaate Hain Soch Lena.
Mohabbton Mein Toh Aise Aise Sailaab Aate Hain Soch Lena ..!

Ye Uljhi Zulfen,
Ye Laal Ankhein,
Ye Maile Kapde,
Ye Zard Chehra,
Hasas Logon Ki Zindagi Mein Ye Baab Aate Hain Soch Lena ..!

Aadha Din Toh Sulagte Sehra Ki Jalti Retton Pe Chal Liya Kar..
Ki Hijraton Mein Toh Iss Se Badh Kar Azaab Aate Hain Soch Lena ..!

Hijar Ne Mere Tabaah Kiya Hai Toh Chhod Do Na Ye Pyar Karna..
Ki Unki Jaanib Se Iss Tarah Bhi  Jawaab Aate Hain Soch Lena …!

 

Es Qadar Aam Bhi Kahan Tha Woh Shakhs..

Es qadar aam bhi kahan tha woh shakhs,

Ki mujhe zindagi mein mil jata …!

 

Jab Usne Wada Kiya, Hum Ne Aitbaar Kiya..

Saboot ye hai mohabbat ki saada lohi ka,

Jab usne wada kiya, hum ne aitbaar kiya …!

Garmi-e Hasrat-e Nakaam Se Jal Jaate Hain..

Garmi-e hasrat-e nakaam se jal jaate hain,
hum charaagon ki tarah shaam se jal jaate hain.

Shama jis aag mein jalti hai numaaish ke liye,
hum usi aag mein gumnaam se jal jaate hain.

Bach niklte hain agar aatish-e sayyaal se hum,
shola-e aariz-e gulfaam se jal jaate hain.

Khud-numaai toh nahi shewa-e arbaab-e wafa,
jin ko jalna ho woh aaraam se jal jaate hain.

Rabt-e baaham pe humein kya na kahenge dushman,
aashna jab tere paigaam se jal jaate hain.

Jab bhi aata hai mera naam tere naam ke saath,
jaane kyon log mere naam se jal jaate hain. !!

 

Rah-e Mula isey izhaar Na Samjha Jaaye..

Uss ne mujhe phool pesh kiya aur keha, 

Rah-e mula isey izhaar na samjha jaaye.  !!

Un Ko Dekha Toh Khuda Yaad Aaya..

Hum khuda ke kabhi qaayal hi na the,

Un ko dekha toh khuda yaad aaya. !!

 

Ye Na Jaane The Ki Uss Mehfil Mein Dil Reh Jayega..

Ye na jaane the ki uss mehfil mein dil reh jayega,

Hum ye samjhe the chale aayenge dum bhar dekh kar. !!

Hum Ko Toh Umar Lagi Yaar Tak Aate Aate..

Lafz toote lab-e izhaar tak aate aate,
Mar gaye hum tere mayaar tak aate aate.

Hum samajhte the ki kuchh waqt lagega shaayad,
Ek inkaar ko iqraar tak aate aate.

Haath rakhna pada seene pe humein bhi aakhir,
Dil kahan rehta hai dildaar tak aate aate.

Ek lamhe ki musaafat bhi badi hoti hai,
Hum ko toh umar lagi yaar tak aate aate. !!

Mohabbat Kam Nahi Hogi..

poetry pic

Meri aankhein salamat hain,
Mera dil mere seene mein dhadakta hai,
Mujhe mehsoos hota hai..
Mohabbat kam nahi hogi.

Mohabbat ek wada hai..
Jo sachai ki undekhe kisi saat mein hota hai,
Kisi rahat mein hota hai.
Ye wada shayari ban ke mere jazbon mein dhulta hai.
Mujhe mehsoos hota hai..
Mohabbat kam nahi hogi.

Mohabbat ek mousam hai,
Ki jis mein khwaab ugte hain toh,
Khwabon ki hari shakhein..
Gulaabon ko bulaati hain,
Unhein khushboo banati hain.
Ye khushboo jab
Humaari khidkiyon mein dastakien de kar guzrti hain
Mujhe mehsoos hota hai..
Mohabbat kam nahi hogi…!!

Bahut Aaraam Karna Chahti Hun..

girl in lover's thoughts

Bahut Aaraam Karna Chahti Hun,
Yehi Ek Kaam Karna Chahti Hun.

Shaoor-e Aagahi Ek Almiaa Hai,
Isey Neelaam Karna Chahti Hun.

Main Apni Umar Ke Saare Asaasey,
Tumhaare Naam Karna Chahti Hun.

Tumhaare Kheima-e Khushbu Mein Reh Kar,
Main Subah-o Shaam Karna Chahti Hun.

Charaaghon Se Hawa Ki Dushmani Hai,
Isey Nakaam Karna Chahti Hun. !!