Home / Love Shayari (page 10)

Love Shayari

Teri Mohabbat Sa Magar Koi Tang Nahi Karta..

Hain pareshaaniyan yun toh bahut zindagi mein,

Teri mohabbat sa magar, koi tang nahi karta …!

Mohabbat Ko Laazim Hai Aawaargi Bhi..

Mohabbat ko laazim hai aawaargi bhi,

Nahi ishq karta asar baithe baithe …!

Mohabbat Farz Jaisi Hai..

Love shayari-poetry, aishwarya-abhishek

Mohabbat Farz Jaisi Hai,
Nibhaana Seekh Jaaoge..

Dilon Pe Qarz Jaisi Hai,
Chukaana Seekh Jaaoge..

Labon Pe Phool Jaisi Hai,
Khilaana Seekh Jaaoge..

Nazar Mein Aag Jaisi Hai,
Lagaana Seekh Jaaoge..

Tum Tak Faasla Jo Hai,
Mitaana Seekh Jaaoge..

Kabhi Jo Dil Mein Aa Beithe,
Zamaana Bhool Jaaoge …!

Usey Ye Kaun Samajhaaye..

sad girl at sea

Usey ye kaun samajhaaye ?

woh dasht-e khaamoshi mein..
Ungaliyon mein seepiyan pehne,
kisi sookhe samandar ki..
adhoori pyaas ki baatein..
Bahut chup-chaap sunta hai,
bahut khaamosh rehta hai.. !

Usey ye kaun samajhaaye ?

Khushi ke ek aansoo se..
samandar bhar bhi jaate hain.. !
Bahut khaamosh rehne se..
talluq marr bhi jaate hain …!!

Ajab Ek Shor Sa Barpa Hai Kahin..

Jaun Elia Poetry 

Ajab ek shor sa barpa hai kahin,
Koi khaamosh ho gaya hai kahin.

Hai kuchh aisa ki jaise ye sab kuchh,
Ab se pehle bhi ho chuka hai kahin.

Jo yahan se kahin na jaata tha,
Woh yahan se chala gaya hai kahin.

Tujh ko kya ho gaya ki cheezon ko,
Kahin rakhta hai, dhundhta hai kahin.

Tu mujhe dhoondh, main tujhe dhoondhun,
Koi hum mein se reh gaya hai kahin.

Isi kamre se ho ke koi widaa,
Isi kamre mein chhup gaya hai kahin . !!

Click Here For Jaun Elia Poetry Collection

Ab Ke Tajdeed-e Wafa Ka Nahi Imkaan Janaan..

Ab ke tajdeed-e-wafa* ka nahi imkaan* janaa,
yaad kya tujh ko dilaayen tera paimaan janaa.

Yun hi mausam ki adaa dekh ke yaad aaya hai,
kis qadar jald badal jaate hain insaan janaa.

Zindagi teri ataa thi so tere naam ki hai,
hum ne jaise bhi basar ki tera ehsaan janaan.

Dil ye kehta hai ki shayad hai fasurda* tu bhi,
dil ki kya baat karein dil toh hai nadaan janaan.

Awwal awwal ki mohabbat ke nashe yaad toh kar,
be-piye bhi tera chehra tha gulishtaan janaan.

Aakhir aakhir toh ye aalam hai ki ab hosh nahi,
ragg-e meena sulag uthi ki ragg-e-jaan janaan.

Muddaton se yahi aalam na tawaqqo na umeed,
dil pukaare hi chala jata hai janaan janaan.

Hum bhi kya sada the hum ne bhi samajh rakha tha,
ghum-e-dauran se juda hai ghum-e-janaan janaan.

Ab ke kuchh aisi saji mehfil-e-yaraan janaan,
sar-ba-zaanu hai koi sar-ba-girebaan janaan.

Har koi apni hi aawaaz se kaanp uthta hai,
har koi apne hi saaye se hiraasaan janaan.

Jis ko dekho wahi zanzeer-ba-paa lagta hai,
shehar ka shehar hua daakhil-e-zindaan janaan.

Ab tera zikar bhi ghazal mein shayad hi aaye,
aur se aur hue dard ke unwaan janaan.

Hum ki roothi hui rutt ko bhi mana lete the,
hum ne dekha hi na tha mausam-e-hijraan janaa.

Hosh aaya toh sabhi khwaab the raiza raiza,
jaise udte hue auraaq-e-pareshaan* janaa. !!

*[ Tajdeed-e-wafa=Renewal Of Faith,
Imkaan=possibility , Fasurda=Disappointed
Auraaq-e-pareshaan=scattered pages ]

 

Tere Badan Se Jo Chhu Kar Idhar Bhi Aata Hai..

Tere badan se jo chhu kar idhar bhi aata hai,
misaal-e rang woh jhaunka nazar bhi aata hai.

Tamaam shab jahan jalta hai ek udaas diya,
hawa ki raah mein ek aisa ghar bhi aata hai.

Woh mujhe toot ke chaahega chhod jaayega,
mujhe khabar thi usey ye hunar bhi aata hai.

Ujaad bann mein utarta hai ek jugnu,
hawa ke saath koi humsafar bhi aata hai.

wafa ki kaun si manzil pe usne chhoda tha,
ki woh toh yaad humein bhool kar bhi aata hai.

Jahan lahoo ke samundar ki hadd theharti hai,
wahin jazeera-e-laal-o-gauhar* bhi aata hai.

Chale jo zikar farishton ki paarsaai* ka,
toh zer-e-behas* maqaam-e-bashar* bhi aata hai.

Abhi sinaan* ko sambhaale rahein aduu mere,
ki un safon* mein mera sar bhi aata hai.

Kabhi kabhi mujhe milne bulandiyon se,
shua-e-subh* ki soorat utar bhi aata hai.

Isiliye main kisi shab na so saka ‘Mohsin
woh mehtaab kabhi baam* par bhi aata hai. !!

*[Jazeera-e-laal-o-gauhar=an island of rubies and pearls,
Paarsaai=holiness, zer-e-behas=under discussion,
Maqaam-e-bashar=place of human, baam=tarace
Sinaan=sword, Safon=lines, Shua-e-subh=ray of morning]

Mohsin Naqvi

Mujhko Aap Apna Aap Dijiyega – Jaun Elia Ghazal

Mujhko aap apna aap dijiyega,
aur kuchh bhi na mujh se lijiyega.

Aap bemisl, bemisaal hun main,
mujh siwa aap kis pe rijhiyega.

Aap jo hain azal se hi benaam,
naam mera kabhi toh lijiyega.

Aap bas mujh mein hi toh hain, so aap
mera behad khyaal kijiyega.

Hai agar waaqai sharaab haraam,
aap hothon se mere pijiyega.

Intezaari hun apna main din raat,
ab mujhe aap bhej dijiyega.

Aap mujh ko bahut pasand aaye,
aap meri kameez sijiyega.

Dil ke rishte hain khoon, jhooth ki sach,
ye muamma kabhi na boojhiyega.

Hai mere jism-o jaan ka maazi kya ?
mujh se bas ye kabhi na poochiyega.

Mujh se meri kamaai ka sar-e shaam,
paai paai hisaab lijiyega.

Zindagi kya hai, ik hunar karna
so qareene se zehar pijiyega.

Main jo hun, ‘Jaun Eliya’ hun janaab,
iska behad lihaaz kijiyega. !!

Khud-Ba Khud Theek Hone Lagta Hun..

Tere Nazdeek Hone Lagta Hun,

Khud-Ba Khud Theek Hone Lagta Hun …!

Jab Kaanch Uthaane Pad Jaayen Tum Haath Humara Le Jana..

Jab Kaanch Uthaane Pad Jaayen,
Tum Haath Humara Le Jana.

Jab Samjho Ki Koi Saath Nahi,
Tum Saath Humara Le Jana.

Jab Dekho Ki Tum Tanha Ho,
Aur Raaste Hain Dushwar Bahut,

Tab Hum Ko Apna Keh Dena,
Bebaak Sahara Le Jana.

Jo Baazi Bhi Tum Jeetoge,
Jo Manzil Bhi Tum Paaoge,

Hum Paas Tumhare Hon Na Hon,
Ehshas Humara Le Jana.

Jab Yaad Humari Aayegi,
Tum Paas Humare Aa Jana,

Ek Muskurahat De Jana,
Tum Jaan Humari Le Jana.

Jab Kaanch Uthaane Pad Jaayen,
Tum Haath Humara Le Jana .!!