Home / Khwaab shayari (page 4)

Khwaab shayari

Zinda Rahen Toh Kya Hai Jo Mar Jaayen Hum Toh Kya..

Zinda rahen toh kya hai jo mar jayen hum toh kya,
duniya se khamoshi se guzar jaayen hum toh kya.

Hasti hi apni kya hai zamaane ke saamne,
ek khwaab hain jahaan mein bikhar jaayen hum toh kya.

Ab kaun muntazir hai humare liye wahan,
shaam aa gayi hai laut ke ghar jaayen hum toh kya.

Dil ki khalish toh saath rahegi tamaam umar,
dariya-e ghum ke paar utar jaayen hum toh kya. !!

Munir Niazi

Aa Gayi Yaad Shaam Dhalte Hi..

Aa gayi yaad shaam dhalte hi,
bujh gaya dil chiraagh jalte hi.

Khul gaye shehar-e-ghum ke darwaaze,
ek zaraa si hawaa ke chalte hi.

Kaun tha tu ki phir na dekha tujhe,
mit gaya khwaab aankh malte hi.

Tu bhi jaise badal sa jata hai,
aks-e-deewaar ke badalte hi.

Khoon sa lag gaya hai haathon mein,
chadh gaya zehar gul masalte hi. !!

Munir Niazi

Ishq Mein Lajaawab Hain Hum Log..

Ishq mein lajawaab hain hum log,
maahtaab, aaftaab hain hum log.

Garche ahal-e-sharaab hain hum log,
ye na samjho kharaab hain hum log.

Shaam se aa gaye jo peene par,
subah tak aaftaab hain hum log.

Hum ko daava-e-ishqbaazi hai,
mustahiqq-e-azaab hain hum log.

Naaz karti hai khana-veerani,
aise khana-kharaab hain hum log.

Hum nahin jaante khizaan kya hai,
kushtagaan-e-shabaab hain hum log.

Tu humara jawaab hai tanha,
aur tera jawaab hain hum log.

Tu hai dariya-e-husn-o-mahboobi,
shakl-e-mauj-o-hubaab hain hum log.

Go saraapa hujaab hain phir bhi,
tere rukh ki naqaab hain hum log.

Khoob hum jaante hain apni qadr,
kitne na-kaamyaab hain hum log.

Hum se ghaflat na ho toh phir kya ho,
rah-rav-e-mulk-e-khwaab hain hum log.

Hum pe naazil hua saheefa-e-ishq,
saahibaan-e-kitaab hain hum log.

Har haqeeqat se jo guzar jaayen,
woh sadaaqat-ma.aab hain hum log.

Jab mili aankh hosh kho baithe,
kitne haazir-jawaab hain hum log.

Hum se puchho ‘jigar ki sarmasti,
mahram-e-aan-janaab hain hum log. !!

Jigar Moradabadi

Apne Ehsaas Se Chhoo Kar Mujhe Sandal Kar Do..

Apne ehsaas se chhoo kar mujhe sandal kar do,
main ki sadiyon se adhoora hun muqammal kar do.

Na tumhein hosh rahe na mujhe hosh rahe,
iss qadar toot ke chaaho, mujhe paagal kar do.

Apne honthon se koi mohar lagaao mujh par, 
ek nazar pyaar se dekho mujhe ghayal kar do.

Tum apni hatheli ko mere pyaar ke mehandi se rango,
apni aankhon mein mere naam ka kaajal kar do.

Iss ke saaye mein mere khwaab mehak uthenge,
mere chehre pe chamakta hua aanchal kar do.

Dhoop hi dhoop hun main toot ke barso mujh pe,
iss qadar barso meri rooh mein jal – thal kar do.

Jaise sehraaon mein har shaam hawaa chalti hai,
uss tarah mujh mein chalo aur mujhe thall kar do.

Tum chhupa lo mera dil aout mein apne dil ke,
aur mujhe meri nighaahon se bhi ojhal kar do.

Masla hun toh nighaahen na churaao mujh se,
apni chaahat se tawaja se mujh hal kar do.

Apne ghum se keho har waqt mere saath rahe,
ek ehsaan karo uss ko musalsal kar do.

Mujh pe chhaa jaao kisi aag ki soorat janaa,
aur meri zaat ko sookha hua jungle kar do. !!

Wasi Shah

Jo Us Ke Saamne Mera Ye Haal Aa Jaye..

Jo uss ke saamne mera ye haal aa jaye,
toh dukh se aur bhi uss par jamaal aa jaye.

Mera khyal hai ghunghroo pehan ke naachega,
agar khyal ko tera khyal aa jaye.

Har ek shaam naye khwaab uss par garhenge,
humare haath agar teri shaal aa jaye.

Inhi dino woh mere saath chaai peeta tha,
kahin se kaash mera pichhla saal aa jaye.

Mein apne ghum ke khazaane kahan chhupaaunga,
agar kahin se koi aur maal aa jaye.

Har ek baar naye dhang se sajaayen tujhe,
humhare haath jo phoolon ki daal lag jaye.

Ye doobta hua sooraj thehar na jaye ‘wasi
agar woh saamne waqat-e zawaal aa jaye. !!

Wasi Shah

Ek Zakhmi Parinde Ki Tarha Jaal Mein Hum Hain..

Ek zakhmi parinde ki tarha jaal mein hum hain,
aye ishq abhi tak tere janjaal mein hum hain.

Maa khwaab mein aa kar ye bata jati hai har roz,
boseeda si odhi hui ek shaal mein hum hain.

Hanste hue hontho ne bharam rakha humara,
woh dekhne aaya tha ki kis haal mein hum hain.

Ab aap ki marzi hai sambhaalen na sambhaalen,
khushbu ki tarha aap ke rumaal mein hum hain.

Main phoot ke rone laga jab maut ke dar se,
neki ne keha naama-e amaal mein hum hain.

Hum thak ke kahin baithne waale nahin hargiz.
ek hirni ki langdaati hui chaal mein hum hain.

Hum ne bhi sanwaare hain bahut gesu-e urdu,
dilli mein agar aap hain, bangaal mein hum hain. !!

Munawwar Rana

Bheegi Hui Aankhon Ka Ye Manzar Na Milega..

Seprating-arguing-Boy-and-girl-on-railway-station-in-rain-poetry-shayari

Bheegi hui aankhon ka ye manzar na milega,
ghar chhod ke mat jaao kahin ghar na milega.

Phir yaad bahut aayegi zulfon ki ghani shaam,
jab dhoop me saaya koi sar par na milega.

Aansoo ko kabhi oss ka qatra na samajhna,
aisa tumhe chaahat ka samundar na milega.

Iss khwaab ke mahaul mein be’khwaab hain aankhen,
bazaar mein aisa koi zewar na milega.

Ye soch lo ab aakhiri saaya hai mohabbat,
iss dar se uthoge toh koi dar na milega. !!

Bashir Badr

Meri Aankh Ko Ye Sab Kaun Bataane Dega..

Meri aankh ko ye sab kaun bataane dega,
khwaab jis ke hain wohi neend na aane dega.

Uss ne yun baandh liya khud ko naye rishton mein,
jaise mujh par koi ilzaam na aane dega.

Sab andhere se koi wada kiye baithe hain,
kaun aise mein mujhe shamaa jalaane dega.

Bheegti jheel, kamal, baagh mehak, sannata
ye mera gaaon mujhe shehar na jane dega.

Woh bhi aankhon mein kayi khwaab liye baitha hai,
ye tasawwur hi kabhi neend na aane dega.

Kal ki baaten na karo, mujh se koi ehad na lo,
waqt badlega toh kuchh yaad na aane dega.

Ab toh halaat se samjhauta hi kar leeje ‘waseem
kaun maazi ki taraf laut ke jaane dega. !!

Wasim Barelvi

Main Apne Khwaab Se Bichhda Nazar Nahin Aata..

Main apne khwaab se bichhda nazar nahin aata,
tu iss sadi mein akela nazar nahin aata.

Ajab dabaav hai in baahri hawaaon ka,
gharon ka bojh bhi uthta nazar nahin aata.

Main ek sada pe humesha ko ghar chhod aaya tha,
magar pukaarane wala nazar nahin aata.

Main teri raah se hatne ko hat gaya lekin,
mujhe toh koi bhi raasta nazar nahin aata.

Dhuaan bhara hai yahan sabhi ki aankhon mein,
kisi ko ghar mera jalta nazar nahi aata. !!

Wasim Barelvi

Kahan Sawaab Kahan Kya Azaab Hota Hai..

Kahan sawaab kahan kya azaab hota hai,
mohabbaton mein kab itna hisaab hota hai.

Bichhad ke mujh se tum apni kashish na kho dena,
udaas rehne se chehra kharaab hota hai.

Usey pata hi nahin hai ki pyaar ki baazi,
jo haar jaaye wohi kaamyaab hota hai.

Jise main likhta hun aise ki khud hi padh paaun,
kibaa-e zeest mein aisa bhi baab hota hai.

Bahut bharosa na kar lena apni aankhon par,
dikhaayi deta hai jo kuchh woh khwaab hota hai. !!

Wasim Barelvi