Home / Khushboo Shayari

Khushboo Shayari

Zara Si Der Mein Hum Kaise Kholte Us Ko..

Zara si der mein hum kaise kholte uss ko,
tamaam umar lagi jhooth bolte uss ko.

Jise kasheed kiya tha khumaar-e-khushboo se,
misaal-e rang hawaaon mein gholtey uss ko.

Woh khwaab mein hi utarta shuaa-e subah ke saath,
hum apne aap hi palkon pe taultey uss ko.

Woh ashq tha usey aankhon mein dafan hona tha,
gauhar na tha ki sitaaron mein roltey uss ko.

Woh bewafa tha toh iqraar laazmi karta,
kuchh aur der meri jaan tatoltey uss ko.

Kisi ki aankh se ‘mohsin’ zaroor peeta hai,
tamaam shehar ne dekha hai daultey uss ko. !!

Patthar Tha Magar Barf Ke Golon Ki Tarah Tha..

Urdu Sad Poetry

Patthar tha magar barf ke golon ki tarah tha,
ek shakhs andheron mein ujaalon ki tarah tha.

Khwaabon ki tarah tha na khyaalon ki tarah tha,
woh ilm-e riyaazi ke sawaalon ki tarah tha.

Uljha hua aisa ki kabhi hall ho na paaya,
suljha hua aisa ki misaalon ki tarah tha.

Woh mil toh gaya tha magar apna hi muqaddar,
shatranj ki uljhi hui chaalon ki tarah tha.

Woh rooh mein khushboo ki tarah ho gaya tahleel,
jo door bahut chaand ke haalon ki tarah tha. !!

Click Here For  Urdu Poems (Nazms) Collection

Aainon Mein Aks Na Hon Toh Hairat Rehti Hai..

Aainon mein aks na hon toh hairat rehti hai,
jaise khaali aankhon mein bhi wehshat rehti hai.

Har dum duniya ke hungaame ghere rakhte the,
jab se tere dhyaan lage hain fursat rehti hai.

Karni hai toh khul ke karo inkaar-e-wafa ki baat,
baat adhoori reh jaaye toh hasrat rehti hai.

Shehar-e sukhan mein aisa kuchh kar izzat ban jaaye,
sab kuchh mitti ho jaata hai izzat rehti hai.

Bante bante dheh jaati hai dil ki har taameer,
khwaahish ke behroop mein shayad qismat rehti hai.

Saaye larazte rehte hain shehron ki galyion mein,
rehte the insaan jahan ab dehshat rehti hai.

Mausam koi khushboo le kar aate jaate hain,
kya kaya hum ko raat gaye tak wehshat rehti hai.

Dhyaan mein mela sa lagta hai beeti yaadon ka,
aksar uss ke ghum se dil ki sohbat rehti hai.

Phoolon ki takhti par jaise rangon ki tehreer,
lauh-e-sukhan par aise ‘amjad’ shohrat rehti hai. !!

Amjad Islam Amjad 

Woh Paani Ki Bundein Woh Barsaat Ka Mausam..

Woh paani ki bundein woh barsaat ka mausam,
Woh teri khushboo woh tere ehasas ka mausam.
Bahut yaad aaya tujh se bichhadne ke baad,
Woh tera milna woh teri mulaqaat ka mausam …!!

Imtihaan Hum Ne Diye Iss Daar-e-Faani Mein Bahut..

Imtihaan hum ne diye iss daar-e-faani mein bahut,
ranj kheenche hum ne apni la-makaani mein bahut.

Woh nahin uss sa toh hai khwaab-e-bahaar-e-jaawedaan,
asal ki khushboo udi hai uss ke saani mein bahut.

Raat din ke aane jaane mein ye sona jaagna,
fikar walon ko pate hain iss nishaani mein bahut.

Koyalen kookin bahut deewaar-e-gulshan ki taraf,
chaand damka hauz ke shaffaf paani mein bahut.

Uss ko kya yaaden thi kya aur kis jagah par rah gayi,
tez hai dariya-e-dil apni rawaani mein bahut.

Aaj uss mehfil mein tujh ko bolte dekha ‘munir
toh ki jo mashHoor tha yun be-zubaani mein bahut. !!

Munir Niazi

Hansi Chhupa Bhi Gaya Aur Nazar Mila Bhi Gaya..

Hansi chhupa bhi gaya aur nazar mila bhi gaya,
ye ek jhalak ka tamasha jigar jala bhi gaya.

Utha tu jaa bhi chuka tha ajeeb mehmaan tha,
sadaayen de ke mujhe neend se jaga bhi gaya.

Ghazab hua jo andhere mein jal uthi bijli,
badan kisi ka tilismaat kuchh dikha bhi gaya.

Na aaya koi lab-e-baam shaam dhalne lagi,
wufoor-e-shoq se aankhon mein khoon aa bhi gaya.

Hawa thi gehri ghata thi hina ki khushboo thi,
ye ek raat ka kissa lahoo rula bhi gaya.

Chalo ‘munir chalein ab yahan rahein bhi toh kyon,
woh sang-dil toh yahan se kahin chala bhi gaya .!!

Munir Niazi

Bechain Bahut Phirna Ghabraaye Hue Rahna..

Bechain bahut phirna ghabraaye hue rahna,
ek aag si jazbon ki dahakaaye hue rahna.

Chhalkaaye hue chalana khushboo lab-e-laali ki,
ek baagh sa saath apne mehkaaye hue rahna.

Uss husn ka shewa hai jab ishq nazar aaye,
parde mein chale jana, sharmaaye hue rahna.

Ek shaam si kar rakhna kaajal ke karishme se,
ek chaand sa aankhon mein chamkaaye hue rahna.

Aadat hi bana li hai tum ne toh ‘munir apni
jis shehar mein bhi rahna uktaaye hue rahna. !!

Munir Niazi

Saari Basti Mein Ye Jaadoo Nazar Aaye Mujh Ko..

Saari basti mein ye jaadoo nazar aaye mujh ko,
jo daricha bhi khule tu nazar aaye mujh ko.

Sadiyon ka ratt-jaga meri raaton mein aa gaya,
main ek haseen shakhs ki baaton mein aa gaya.

Jab tassawur mera chupke se tujhe chhoo aaye,
der tak apne badan se teri khushboo aaye.

Gustaakh hawaaon ki shikaayat na kiya kar,
udd jaaye dupatta toh khanak odh liya kar.

Tum poochho aur main na bataaun aise toh halaat nahin,
ek zara sa dil toota hai aur toh koi baat nahin.

Raat ke sannate mein hum ne kya kya dhokhe khaaye hain,
apna hi dil jab dhadka toh hum samjhe woh aaye hain. !!

Qateel Shifai

Tum Meri Aankh Ke Tewar Na Bhula Paaoge..

couple-hugging-sad-seprating-painting-image-wasi-shah-poetry-shayari

Tum meri aankh ke tewar na bhula paaoge,
ankahi baat ko samjhoge toh yaad aaunga.

Hum ne khushiyon tarah dukh bhi ikatthe dekhe,
safha-e zeest ko paltoge toh yaad aaunga.

Iss judaai mein tum andar se bikhar jaaoge,
kisi mazoor ko dekhoge toh yaad aaunga.

Issi andaaz mein hote the mukhaatib mujh se,
khat kisi aur ko likhoge toh yaad aaunga.

Meri khushbu tumhen kholegi gulaabon ki tarah,
tum agar khud se na bologe toh yaad aaunga.

Aaj toh mehfil-e yaaraan pe ho maghroor bahut,
jab kabhi toot ke bikhroge toh yaad aaunga. !!

Wasi Shah

Ek Zakhmi Parinde Ki Tarha Jaal Mein Hum Hain..

Ek zakhmi parinde ki tarha jaal mein hum hain,
aye ishq abhi tak tere janjaal mein hum hain.

Maa khwaab mein aa kar ye bata jati hai har roz,
boseeda si odhi hui ek shaal mein hum hain.

Hanste hue hontho ne bharam rakha humara,
woh dekhne aaya tha ki kis haal mein hum hain.

Ab aap ki marzi hai sambhaalen na sambhaalen,
khushbu ki tarha aap ke rumaal mein hum hain.

Main phoot ke rone laga jab maut ke dar se,
neki ne keha naama-e amaal mein hum hain.

Hum thak ke kahin baithne waale nahin hargiz.
ek hirni ki langdaati hui chaal mein hum hain.

Hum ne bhi sanwaare hain bahut gesu-e urdu,
dilli mein agar aap hain, bangaal mein hum hain. !!

Munawwar Rana