Home / Khuda Poetry (page 2)

Khuda Poetry

Sirf Khanjar Hi Nahin Aankhon Mein Paani Chahiye..

Sirf khanjar hi nahin aankhon mein paani chahiye,
aye khuda dushman bhi mujh ko khaandaani chahiye.

Shehar ki saari alif-lailaayen burhi ho chuki,
shehzaade ko koi taaza kahaani chahiye.

Maine aye sooraj tujhe pooja nahin samjha toh hai,
mere hisse mein thodi dhoop aani chahiye.

Meri qeemat kaun de sakta hai iss bazaar mein,
tum zulekha ho tumhe qeemat lagaani chahiye.

Zindagi hai ek safar aur zindagi ki raah mein,
zindagi bhi aaye toh thokar lagaani chahiye.

Maine apni khushk aankhon se lahoo chhalka diya,
ek samundar keh raha tha mujh ko paani chahiye. !!

Rahat Indori

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Uthi Nigaah Toh Apne Hi Ru-ba-ru Hum The..

Uthi nigaah toh apne hi ru-ba-ru hum the,
zameen aaina-khana thi chaar soo hum the.

Dinon ke baad achaanak tumhara dhyan aaya,
khuda ka shukr ki uss waqt ba-vazu hum the.

Woh aaina toh nahin tha par aaine sa tha,
woh hum nahin the magar yaar hu-ba-hu hum the.

Zameen pe ladte hue aasmaan ke narge mein,
kabhi kabhi koi dushman kabhu kabhu hum the.

Humara zikr bhi ab jurm ho gaya hai wahan,
dinon ki baat hai mehfil ki aabroo hum the.

Khyaal tha ki ye pathraav rok dein chal kar,
jo hosh aaya toh dekha lahoo lahoo hum the. !!

Rahat Indori

Ye Sard Raaten Bhi Ban Kar Abhi Dhuaan Udd Jaayen..

Ye sard raaten bhi ban kar abhi dhuaan udd jaayen,
woh ek lihaaf main odhun toh sardiyaan udd jaayen.

Khuda ka shukr ki mera makaan salaamat hai,
hain itni tez hawaayen ki bastiyaan udd jaayen.

Zameen se ek taalluq ne baandh rakha hai,
badan mein khoon nahin ho toh haddiyaan udd jaayen.

Bikhar bikhar si gayi hai kitaab saanso ki,
ye kaaghzaat khuda jaane kab kahan udd jaayen.

Rahe khyal ke majzoob-e-ishq hain hum log,
agar zameen se phoonken toh aasmaan udd jaayen.

Hawaayen baaz kahan aati hain sharaarat se,
saron pe haath na rakhen toh pagdiyaan udd jaayen.

Bahut ghuroor hai dariya ko apne hone par,
jo meri pyaas se uljhe toh dhajjiyan udd jaayen. !!

Rahat Indori

Ye Ehtraam Toh Karna Zaroor Padta Hai..

Ye ehtraam toh karna zaroor padta hai,
jo tu khareede toh bikna zaroor padta hai.

Bade saleeqe se yeh keh ke zindagi guzri,
har ek shakhs ko marna zaroor padta hai.

Woh dosti ho  mohabbat ho chaahe sona ho,
kasauti pe parakhna zaroor padta hai.

Kabhi jawaani se pehle  kabhi budhaape mein,
khuda ke saamne jhukna zaroor padta hai.

Ho chaahe jitni bhi puraani dushmani lekin,
koi pukare toh rukna zaroor padta hai.

Sharaab pee ke behakne se kaun rokega,
sharaab pee ke behakna zaroor padta hai.

Wafa ki raah pe chaliye magar ye dhyaan rahe,
ki darmiyaan mein sehra zaroor padta hai. !!

Munawwar Rana

Hum Ko Mita Sake Ye Zamaane Mein Dum Nahin..

Hum ko mita sake ye zamaane mein dum nahin,
hum se zamaana khud hai zamaane se hum nahin.

Be-faayda alam nahin bekaar ghum nahin,
taufeeq de khuda toh ye nemat bhi kam nahin.

Meri zubaan pe shikwa-e-ahl-e-sitam nahin,
mujh ko jagaa diya yahi ehsaan kam nahin.

Ya rab! hujoom-e-dard ko de aur wus.aten
daaman toh kya abhi meri aankhen bhi namm nahin.

Shikwa toh ek chhed hai lekin haqeeqatan,
tera sitam bhi teri inaayat se kam nahin.

Milta hai kyon maza sitam-e-rozgaar mein,
tera karam bhi khud jo shareek-e-sitam nahin.

Ab ishq uss muqaam pe hai justujoo-navard
saaya nahin jahaan koi naqs-e-kadam nahin.

Zaahid kuchh aur ho na ho maikhaane mein magar,
kya kam ye hai ki shikwa-e-dair-o-haram nahin.

Marg-e Jigar pe kyon teri aankhen hain ashk-rez
ek saaniha sahi magar itna aham nahin. !!

Jigar Moradabadi

Aagahi Mein Ek Khala Maujood Hai..

Aagahi mein ek khala maujood hai,
iss ka matlab hai khuda maujood hai.

Hai yaqeenan kuchh magar waazeh nahin,
aap ki aankhon mein kya maujood hai.

Baankpan mein aur koi shayy nahin,
saadgi ki inteha maujood hai.

Hai mukammal baadshaahi ki daleel,
ghar mein gar ek boriyaa maujood hai.

Shauqiya koi nahin hota ghalat,
iss mein kuchh teri razaa maujood hai.

Iss liye tanha hun main garm-e safar,
qaafile mein rahnuma maujood hai.

Har mohabbat ki binaa hai chaashni,
har lagan mein mudda maujood hai.

Har jagah, har shehar, har iqleem mein
dhoom hai uss ki jo na-maujood hai.

Jis se chhupna chahta hun main ‘adam
woh sitamgar ja-ba-jaa maujood hai. !!

Abdul Hamid Adam