Home / Judaai Shayari (page 5)

Judaai Shayari

Ab Kis Se Kahen Aur Kaun Sune Jo Haal Tumhare Baad Hua..

Sad_alone_thinking_girl_Noshi_gilani_shayari_poetry

Ab  kis se kahen aur kaun sune jo haal tumhare baad hua,
iss dil ki jheel si aankhon mein ek khwaab bahut barbaad hua.

Ye hijr-hawa bhi dushman hai iss naam ke saare rangon ki,
woh naam jo mere honthon par khushboo ki tarah aabaad hua.

Uss shehar mein kitne chehre the kuchh yaad nahin sab bhool gaye,
ek shakhs kitaabon jaisa tha woh shakhs zubaani yaad hua.

Woh apne gaaon ki galiyaan thi dil jin mein naachta gaata tha,
ab iss se farq nahin padta nashaad hua ya shaad hua.

Benaam sataaish rehti thi in gehri saanwali aankhon mein,
aisa toh kabhi socha bhi na tha dil ab jitna bedaad hua. !!

-> Noshi Gilani

Har Zulm Tera Yaad Hai Bhoola Toh Nahin Hun..

Boy-Girl-on-bridge-rude-in-evening-ghazal-shayari-poetry

Har zulm tera yaad hai bhoola toh nahin hun,
aye wada-e faramosh main tujh sa toh nahin hun.

Saahil pe khade ho tumhe kya ghum chale jana,
main doob raha hun abhi dooba toh nahin hun.

Chup chaap sahi maslehatan waqt ke haathon,
majboor sahi waqt se haara toh nahin hun.

Muztar kyon mujhe dekhta rehta hai zamana,
deewana sahi unka tamasha toh nahin hun …!!

Poet: Altaf Muztar

Kahin Par Chhup Ke Ro Lene Ko Tehkhana Bhi Hota Tha..

Kahin par chhup ke ro lene ko tehkhana bhi hota tha,
har ek aabaad ghar mein ek veeraana bhi hota tha.

Taymmum ke liye mitti ka tukda tak nahin milta,
abhi kal tak gharon mein ek wujookhana bhi hota tha.

Ye aankhen jin mein ek muddat tak aansoo nahin aaye,
unhi aankhon mein pehle ek mayykhana bhi hota tha.

Abhi iss baat ko shayad zyada din nahin gujre,
taswwur mein humare ek parikhana bhi hota tha.

Muhabbat itni sasti bhi nahin thi uss zamaane tak,
muhabbat karne wala pehle deewaana bhi hota tha.

Sabhi kadiyan salaamat thi humare beech rishton ki,
humein gaahe-ba-gaahe apne ghar jana bhi hota tha.

Miyaan Punjab mein Lahore hi shaamil na tha pehle,
iss ke khet khalihaano mein Hariyana bhi hota tha. !!

Woh Dushman-e-Jaan, Jaan Se Pyara Bhi Kabhi Tha..

Woh dushman-e jaan, jaan se pyara bhi kabhi tha
ab kis se kahen koi humara bhi kabhi tha.

Utra hai ragg-o-pai mein toh dil kat sa gaya hai,
ye zehar-e judaai ki gawaara bhi kabhi tha.

Har dost jahan abr-e gurezaan ki tarah hai,
ye shehar kabhi shehar humara bhi kabhi tha.

Titli ke taaqub mein koi phool sa bachcha,
aisa hi koi khwaab humara bhi kabhi tha.

Ab agle zamane ke milen log toh puchhen,
jo haal humara hai tumhara bhi kabhi tha.

Har bazm mein hum ne usey afsurda hi dekha,
kahte hain ‘faraz kabhi anjuman-aara bhi tha. !!

Iss Se Pehle Ki Bewafa Ho Jayen..

Iss se pehle ki bewafa ho jayen,
kyon na aye dost hum judaa ho jayen.

Tu bhi heere se ban gaya patthar,
hum bhi kal jaane kya se kya ho jayen.

Tu ki yakta tha beshumaar hua,
hum bhi tooten toh ja-ba-jaa ho jayen.

Hum bhi majbooriyon ka uzr karen,
phir kahin aur mubtila ho jayen.

Hum agar manzilein na ban payen,
manzilon tak ka raasta ho jayen.

Der se soch mein hain parwaane,
raakh ho jayen ya hawa ho jayen.

Ishq bhi khel hai naseebon ka,
khaak ho jayen keemiya ho jayen.

Ab ke gar tu mile toh hum tujh se,
aise liptein teri qabaa ho jayen.

Bandagi hum ne chhod di hai ‘faraz
kya karen log jab khuda ho jayen. !!

Kabhi Iss Nagar Tujhe Dhoondna, Kabhi Uss Nagar Tujhe Dhoondna..

walking_Alone_sad_thinking_searching_love_lost_boy_man_poetry_ghazal_shayari

Kabhi iss nagar tujhe dhoondna, kabhi uss nagar tujhe dhoondna
kabhi raat bhar tujhe sochna, kabhi raat bhar tujhe dhoondna.

Mujhe ja-baja teri justju, tujhe dhoondta hun main ku-ba-ku
kahan khul saka tere ru-ba-roo, mera iss qadar tujhe dhoondna.

Mera khwaab tha ki khyaal tha, woh urooj tha ki zawaal tha
kabhi farsh par tujhe dhoondna, kabhi arsh par tujhe dhoondna.

Yahan har kisi se hi bair hai, tera shehar qariya-e gair hai
yahan sehal bhi toh nahin koi, mera be-khabar tujhe dhoondna.

Teri yaad aayi toh ro diya,  jo tu mil gaya tujhe kho diya
mere silsile bhi ajeeb hain,  tujhe chhod kar tujhe dhoondna.

Ye meri nazar ka kamaal hai ki meri nazar ka jamaal hai
tujhe shair shair mein sochna, sar-e baam-o dar tujhe dhoondna .!!