Home / Hijr Poetry (page 2)

Hijr Poetry

Gungunaate Hue Aanchal Ki Hawaa De Mujh Ko..

Gungunaate hue aanchal ki hawaa de mujh ko,
ungliyan pher ke baalon mein sula de mujh ko.

Jis tarah faaltu guldaan pade rehte hain,
apne ghar ke kisi kone se laga de mujh ko.

Yaad kar ke mujhe takleef hi hoti hogi,
ek qissa hun purana sa bhula de mujh ko.

Doobte doobte aawaz teri sun jaaun,
aakhiri baar toh saahil se sada de mujh ko.

Main tere hijr mein chup chaap na mar jaaun kahin,
main hun sakte mein aa ke rula de mujh ko.

Dekh mein ho gaya badnaam kitaabon ki tarah,
meri tasheer na kar ab toh jala de mujh ko.

Roothna tera meri jaan liye jata hai
aise naraaz na ho, hans ke dikha de mujh ko.

Aur kuchh bhi nahin maanga mere maalik tujh se,
uss ki galiyon mein padi khaak bana de mujh ko.

Log kehte hain ki ye ishq nigal jata hai,
main bhi iss ishq mein aaya hun, dua de mujh ko.

Yehi auqaat hai meri tere jeewan mein ki main,
koi kamzor sa lamha hun, bhula de mujh ko. !!

Wasi Shah

Tere Gale Mein Jo Baanhon Ko Daal Rakhte Hain..

Tere gale mein jo baanhon ko daal rakhte hain,
tujhe manaane ka kaisa kamaal rakhte hain.

Tujhe khabar hai tujhe sochne ki khaatir,
bahut se kaam muqaddar pe taal rakhte hain.

Koi bhi faisla hum soch kar nahin karte,
tumhare naam ka sikka uchhaal rakhte hain.

Tumhare baad ye aadat si ho gayi apni,
bikharte sookhte pattey sambhaal rakhte hain.

Khushi si milti hai khud ko azziyaten de kar,
so jaan boojh ke dil ko nidhaal rakhte hain.

Kabhi kabhi woh mujhe hans ke dekh lete hain,
kabhi kabhi mera behad khyaal rakhte hain.

Tumhare hijr main ye haal ho gaya apna,
kisi ka khat ho usey bhi sambhaal rakhte hain.

Khushi mile toh tere baad khush nahin hote,
hum apni aankh mein har dum malaal rakhte hain.

Zamane bhar se chhupa kar woh apne aanchal mein,
mere wajood ke tukde sambhaal rakhte hain.

Kuchh iss liye bhi toh behaal ho gaye hum log,
tumhari yaad ka behad khyaal rakhte hain. !!

Wasi Shah

Main Bhi Khush Hun Koi Uss Se Jaa Ke Keh Dena..

Aaditya-roy-kapoor-shardha-kapoor-couple-rude-aashique-2

Main bhi khush hun koi uss se jaa ke keh dena,
agar woh khush hai mujhe be’qaraar karte hue.

Tumhen khabar hi nahin hai ki koi toot gaya,
mohabbaton ko bahut paaedaar karte hue.

Main muskurata hua aaine mein ubharunga,
woh ro padegi achaanak singhaar karte hue.

Mujhe khabar thi ki ab laut kar na aaunga,
so tujh ko yaad kiya dil pe waar karte hue.

Ye keh rahi thi samundar nahin ye aankhen hain,
main inn mein doob gaya aitbaar karte hue.

Bhanwar jo mujh mein pade hain woh main hi jaanta hun,
tumhare hijr ke dariya ko paar karte hue. !!

Wasi Shah

Dil Tha Ki Khush Khyaal Tujhe Dekh Kar Hua..

Dil tha ki khush khyaal tujhe dekh kar hua,
ye shehar be-misaal tujhe dekh kar hua.

Apne khilaaf shehar ke andhe huzoom mein,
dil ko bahut malaal tujhe dekh kar hua.

Tool-e shab-e firaaq teri khair ho ki dil,
amaada-e visaal tujhe dekh kar hua.

Ye hum hu jaante hain judaai ke mod par,
iss dil ka jo bhi haal tujhe dekh kar hua.

Aayi na thi kabhi mere lafzon mein roshani,
aur mujh se ye kamaal tujhe dekh kar hua.

Bichhde toh jaise zehan muattal sa ho gaya,
shehar-e sukhan bahaal tujhe dekh kar hua.

Phir log aa gaye mera maazi kuredne,
phir mujh se ek sawaal tujhe dekh kar hua. !!

Noshi Gilani

Ishq Karo Toh Ye Bhi Socho Arz-e Sawaal Se Pehle..

Ishq karo toh ye bhi socho arz-e sawaal se pehle,
hijr ki poori raat aati hai subah-e wisaal se pehle.

Dil ka kya hai dil ne kitne manzar dekhe lekin,
aankhein paagal ho jaati hain ek khyaal se pehle.

Kis ne reit udaati shab mein aankhein khol ke rakhin,
koi ek misaal toh do na uss ki misaal se pehle.

Kaar-e mohabbat ek safar hai iss mein aa jaata hai,
ek zawaal aasaar sa raasta baab-e kamaal se pehle.

Ishq mein resham jaise waade aur khwaabon ka raasta,
jitna mumkin ho tayy kar lein gard-e malaal se pehle .!!

-> Noshi Gilani

Na Jaane Kaun Mera Kho Gaya Hai Mitti Mein..

Na jaane kaun mera kho gaya hai mitti mein..

zameen kured’ti rehti hain ungaliyan meri …!

Ab Kis Se Kahen Aur Kaun Sune Jo Haal Tumhare Baad Hua..

Sad_alone_thinking_girl_Noshi_gilani_shayari_poetry

Ab  kis se kahen aur kaun sune jo haal tumhare baad hua,
iss dil ki jheel si aankhon mein ek khwaab bahut barbaad hua.

Ye hijr-hawa bhi dushman hai iss naam ke saare rangon ki,
woh naam jo mere honthon par khushboo ki tarah aabaad hua.

Uss shehar mein kitne chehre the kuchh yaad nahin sab bhool gaye,
ek shakhs kitaabon jaisa tha woh shakhs zubaani yaad hua.

Woh apne gaaon ki galiyaan thi dil jin mein naachta gaata tha,
ab iss se farq nahin padta nashaad hua ya shaad hua.

Benaam sataaish rehti thi in gehri saanwali aankhon mein,
aisa toh kabhi socha bhi na tha dil ab jitna bedaad hua. !!

-> Noshi Gilani

Hum Toh Khush The Ki Chalo Dil Ka Junoon Kuchh Kam Hai..

Hum toh khush the ki chalo dil ka junoon kuchh kam hai,
ab jo aaraam bahut hai toh sukoon kuchh kam hai.

Rang-e girya ne dikhayi nahin agli si bahaar,
ab ke lagta hai ki aamezish-e khoon kuchh kam hai.

Ab tera hijr musalsal hai toh ye bhed khula,
ghum-e dil se ghum-e duniya ka fusoon kuchh kam hai.

Uss ne dukh saare zamaane ka mujhe bakhs diya,
phir bhi laalach ka taqaaza hai kahun kuchh kam hai.

Raah-e duniya se nahin dil ki guzargaah se aa,
faasla garche zyada hai pe yun kuchh kam hai.

Tune dekha hi nahin mujh ko bhale waqton mein,
ye kharaabi ki main jis haal mein hun kuchh kam hai.

Aag hi aag mere qarya-e tann mein hai ‘faraz
phir bhi lagta hai abhi soz-e daroon kuchh kam hai. !!

Kabhi Iss Nagar Tujhe Dhoondna, Kabhi Uss Nagar Tujhe Dhoondna..

walking_Alone_sad_thinking_searching_love_lost_boy_man_poetry_ghazal_shayari

Kabhi iss nagar tujhe dhoondna, kabhi uss nagar tujhe dhoondna
kabhi raat bhar tujhe sochna, kabhi raat bhar tujhe dhoondna.

Mujhe ja-baja teri justju, tujhe dhoondta hun main ku-ba-ku
kahan khul saka tere ru-ba-roo, mera iss qadar tujhe dhoondna.

Mera khwaab tha ki khyaal tha, woh urooj tha ki zawaal tha
kabhi farsh par tujhe dhoondna, kabhi arsh par tujhe dhoondna.

Yahan har kisi se hi bair hai, tera shehar qariya-e gair hai
yahan sehal bhi toh nahin koi, mera be-khabar tujhe dhoondna.

Teri yaad aayi toh ro diya,  jo tu mil gaya tujhe kho diya
mere silsile bhi ajeeb hain,  tujhe chhod kar tujhe dhoondna.

Ye meri nazar ka kamaal hai ki meri nazar ka jamaal hai
tujhe shair shair mein sochna, sar-e baam-o dar tujhe dhoondna .!!

Agarche Zor Hawaon Ne Daal Rakha Hai..

Agarche zor hawaon ne daal rakha hai,
magar charaagh ne lau ko sambhaal rakha hai.

Mohabbaton mein toh milna hai ya ujad jana,
mizaaj-e ishq mein kab etidaal rakha hai.

Hawa mein nasha hi nasha fazaa mein rang hi rang,
ye kis ne pairhan apna uchhaal rakha hai.

Bhale dino ka bharosa hi kya rahen na rahen,
so maine rishta-e ghum ko bahaal rakha hai.

Hum aise sada-dilon ko woh dost ho ki khuda,
sabhi ne wada-e fardaa pe taal rakha hai.

Hisaab lutf-e hareefan kiya hai jab toh khula,
ki doston ne zyada khyaal rakha hai.

Bhari bahaar mein ek shaakh par khila hai gulaab,
ki jaise tune hatheli pe gaal rakha hai.

Faraz’ ishq ki duniya toh khoobsurat thi,
ye kisne fitna-e-hijr-o-visaal rakha hai. !!