Home / Ghum Shayari (page 4)

Ghum Shayari

Yaad Aata Hai Roz o Shab Koi..

Yaad aata hai roz-o-shab koi,
hum se rootha hai besabab koi.

Lab-e-joo chhaanv mein darakhton ki,
woh mulaqaat thi ajab koi.

Jab tujhe pehli baar dekha tha,
woh bhi tha mausam-e-tarab koi.

Kuchh khabar le ki teri mehfil se,
door baitha hai jaan-e-balab koi.

Na ghum-e-zindagi na dard-e-firaaq,
dil mein yunhi si hai talab koi.

Yaad aati hain door ki baaten,
pyaar se dekhta hai jab koi.

Chot khaayi hai baarha lekin,
aaj toh dard hai ajab koi.

Jin ko mitna tha mit chuke ‘nasir
un ko ruswa kare na ab koi. !!

Nasir Kazmi

Keh Bhi De Ab Woh Sab Baaten.. [ Wisal Ki Khwahish ]

Keh bhi de ab woh sab baaten,
Jo dil mein posheeda hain.
Saare roop dikha de mujh ko,
Jo ab tak nadeeda hain.
Ek hi raat ke taare hain,
Hum donon uss ko jaante hain.
Doori aur majboori kya hai,
Uss ko bhi pahchaante hain.
Kyon phir donon mil nahin sakte ?
Kyon ye bandhan toota hai ?
Ya koi khot hai tere dil mein ?
Ya mera ghum jhootha hai …!

Munir Niazi

Hai Uss Gulrang Ka Deewar Hona..

Hai uss gulrang ka deewar hona,
ki jaise khwaab se bedaar hona.

Bataati hai mehak dast-e-hina ki,
kisi dar ka pas-e-deewar hona.

Usey rakhta hai sehraaon mein hairaan,
dil-e-shayar ka pur-asraar hona.

Kamaal-e-shauq ka haasil yahi hai,
humara shehar se bezaar hona.

Firaaq aaghaaz hai un saa.aton ka,
hai aakhir jin ka wasl-e-yaar hona.

Yahi hona tha aakhir dasht-e-ghum ko,
humare haath se gulzaar hona.

Mohabbat ka sabab hai beniyaazi,
kashish uss ki hai bas dushwaar hona. !!

Munir Niazi

Thi Jis Ki Justajoo Woh Haqeeqat Nahin Mili..

Thi jis ki justajoo woh haqeeqat nahin mili,
inn bastiyon mein hum ko rafaaqat nahin mili.

Ab tak hain iss gumaan mein ki hum bhi hain dahar mein,
iss weham se nijaat ki soorat nahin mili.

Rehna tha uss ke saath bahut der tak magar,
inn roz-o-shab mein mujh ko ye fursat nahin mili.

Kehna tha jis ko uss se kisi waqt mein mujhe,
iss baat ke kalaam ki mohlat nahin mili.

Kuchh din ke baad uss se juda ho gaye ‘munir
uss bewafa se apni tabeeyat nahin mili. !!

Munir Niazi

Waqt Se Kahiyo Zara Kam Kam Chale..

Waqt se kahiyo zara kam kam chale,
kaun yaad aaya hai aansoo tham chale.

Dum-ba-khud kyon hai khizan ki saltanat,
koi jhonka koi mauj-e-ghum chale.

Chaar soo baajen palon ki paayalen,
iss tarah raqqaasa-e-aalam chale.

Der kya hai aane waale mausamo,
din guzarte jaa rahe hain hum chale.

Kis ko fikar-e-gumbad-e-qasr-habaab
aabjoo paiham chale paiham chale. !!

Munir Niazi

Raat Itni Jaa Chuki Hai Aur Sona Hai Abhi..

Raat itni jaa chuki hai aur sona hai abhi,
iss nagar mein ek khushi ka khwaab bona hai abhi.

Kyon diya dil uss buut-e kamsin ko aise waqt mein,
dil si shayy jis ke liye bas ek khilona hai abhi.

Aisi yaadon mein ghire hain jin se kuchh haasil nahin,
aur kitna waqt un yaadon mein khona hai abhi.

Jo hua hona hi tha so ho gaya hai dosto,
daagh iss ehd-e sitam ka dil se dhona hai abhi.

Hum ne khilte dekhna hai phir khayabaan-e bahaar,
shehar ke ataraf ki mitti mein sona hai abhi.

Baith jaayen saaya-e-daamaan-e-ahmad mein ‘munir
aur phir sochen woh baaten jin ko hona hai abhi. !!

Munir Niazi

Pee Li Toh Kuchh Pata Na Chala Woh Suroor Tha..

Pee li toh kuchh pata na chala woh suroor tha,
woh uss ka saaya tha ki wahi rashk-e-hoor tha.

Kal maine uss ko dekha toh dekha nahin gaya,
mujh se bichhad ke woh bhi bahut ghum se choor tha.

Roya tha kaun kaun mujhe kuchh khabar nahin,
main uss ghadi watan se kayi meel door tha.

Shaam-e-firaaq aayi toh dil doobne laga,
hum ko bhi apne aap pe kitna ghuroor tha.

Chehra tha ya sadaa thi kisi bhooli yaad ki,
aankhen thi uss ki yaaro ki dariya-e noor tha.

Nikla jo chaand aayi mehak tez se ‘munir
mere siwa bhi baagh mein koi zaroor tha. !!

Munir Niazi