Home / Dua Shayari

Dua Shayari

Hai Dua Yaad Magar Harf-e-Dua Yaad Nahin..

Hai dua yaad magar harf-e-dua yaad nahin,
mere naghmaat ko andaaz-e-nawa yaad nahin.

Maine palakon se dar-e-yaar pe dastak di hai,
main woh saail hun jise koi sadaa yaad nahin.

Maine jin ke liye raahon mein bichhaaya tha lahoo,
hum se kehte hain wahi ahad-e-wafa yaad nahin.

Kaise bhar aayi sar-e-shaam kisi ki aankhen,
kaise tharraai charaaghon ki ziya yaad nahin.

Sirf dhundhlaaye sitaaron ki chamak dekhi hai,
kab hua kaun hua kis se khafa yaad nahin.

Zindagi jabr-e-musalsal ki tarah kaati hai,
jaane kis jurm ki paayi hai saza yaad nahin.

Aao ek sajda karen aalam-e-madHoshi mein,
log kehte hain ki ‘saghar ko khuda yaad nahin. !!

Saghar Siddiqui

Baat Phoolon Ki Suna Karte The..

Baat phoolon ki suna karte the,
hum kabhi sher keha karte the.

Mashaalen le ke tumhare ghum ki,
hum andheron mein chala karte the.

Ab kahan aisi tabiyat waale,
chot kha kar jo dua karte the.

Tark-e-ehsaas-e-mohabbat mushkil,
haan magar ahal-e-wafa karte the.

Bikhri bikhri zulfon waale,
qaafile rok liya karte the.

Aaj gulshan mein shagufe ‘saghar
shikwa-e-baad-e-saba karte the. !!

Saghar Siddiqui

Andhere Chaaron Taraf Saayen Saayen Karne Lage..

Andhere chaaron taraf saayen saayen karne lage,
chiraagh haath utha kar duaayen karne lage.

Taraqqi kar gaye beemariyon ke saudagar,
ye sab mareez hain jo ab dawaayen karne lage.

Lahoo-luhaan pada tha zameen par ek sooraj,
parinde apne paron se hawaayen karne lage.

Zameen par aa gaye aankhon se toot kar aansoo,
buri khabar hai farishte khataayen karne lage.

Jhulas rahe hain yahan chaanv baantne waale,
woh dhoop hai ki shajar iltizaayen karne lage.

Azeeb rang tha majlis ka khoob mehfil thi,
saffed posh uthe kaayen kaayen karne lage. !!

Rahat Indori

Safar Ki Had Hai Wahan Tak Ki Kuchh Nishaan Rahe..

Safar ki had hai wahan tak ki kuchh nishaan rahe,
chale chalo ki jahan tak ye aasmaan rahe.

Ye kya uthaaye qadam aur aa gayi manzil,
maza toh jab hai ki pairon mein kuchh thakaan rahe.

Woh shakhs mujh ko koi jaalsaaz lagta hai,
tum uss ko dost samajhte ho phir bhi dhyan rahe.

Mujhe zameen ki gehraaiyon ne daab liya,
main chaahta tha mere sar pe aasmaan rahe.

Ab apne beech marasim nahin adaawat hai,
magar ye baat humare hi darmiyaan rahe.

Magar sitaaron ki faslen uga saka na koi,
meri zameen pe kitne hi aasmaan rahe.

Woh ek sawaal hai phir uss ka saamna hoga,
dua karo ki salaamat meri zabaan rahe. !!

Rahat Indori

Sun Bastiyon Ka Haal Jo Had Se Guzar Gayi..

Sun bastiyon ka haal jo had se guzar gayi,
un ummaton ka zikar jo raaston mein mar gayi.

Kar yaad un dinon ko ki aabaad thi yahan,
galiyan jo khaak-o khoon ki dahshat se bhar gayi.

Sarsar ki zadd mein aaye hue baam-o-dar ko dekh,
kaisi hawaayen kaisa nagar sard kar gayi.

Kya baab the yahan jo sadaa se nahin khule,
kaisi duaayen thi jo yahan beasar gayi.

Tanha ujaad burjon mein phirta hai toh ‘munir
woh zar-fishaaniyan tere rukh ki kidhar gayi. !!

Munir Niazi