Home / Chiraagh Shayari

Chiraagh Shayari

Ye Chiragh Benazar Hai Ye Sitara Bezuban Hai – Bashir Badr

Bashir Badr Poetry

Ye chiraagh benazar hai ye sitaara bezubaan hai,
abhi tujh se milta julta koi dusra kahan hai.

Wahi shakhs jis pe apne dil-o-jaan nisaar kar dun,
woh agar khafa nahin hai toh zaroor badgumaan hai.

Kabhi paa ke tujh ko khona kabhi kho ke tujh ko paana,
ye janam janam ka rishta tere mere darmiyaan hai.

Mere saath chalne waale tujhe kya mila safar mein,
wahi dukh bhari zameen hai wahi ghum ka aasmaan hai.

Main issi gumaan mein barson mutmain raha hun,
tera jism betgaiyyur hai mera pyaar zaavidaan hai.

Unhi raaston ne jis par kabhi tum the saath mere,
mujhe rok rok poochha tera humsafar kahan hai. !!

Bashir Badr Poetry Collection

Subscribe us for Bashir badr & all urdu legend’s poetry, Ghazals, poems, nazms, shayaries.

Apna Ghum Le Ke Kahin Aur Na Jaaya Jaaye..

Apna ghum le ke kahin aur na jaaya jaaye,
ghar mein bikhri hui cheezon ko sajaaya jaaye.

Khudkushi karne ki himmat nahin hoti sab mein,
aur kuchh din abhi auron ko sataaya jaaye.

Jin charaagon ko hawaaon ka koi khauf nahin,
un charaagon ko hawaaon se bachaaya jaaye.

Baagh mein jaane ke aadaab hua karte hain
kisi titli ko na phoolon se udaaya jaaye.

Ghar se masjid hai bahut door chalo yun kar len,
kisi rote hue bachche ko hansaaya jaaye. !!

Nida Fazli

Saaye Dhalne Charaag Jalne Lage..

Saaye dhalne charaag jalne lage,
log apne gharon ko chalne lage.

Itni pur-pech hai bhanwar ki girah,
jaise nafrat dilon mein palne lage.

Door hone lagi jaras ki sadaa,
kaarwan raaste badalne lage.

Uss ke lahje mein barf thi lekin,
chhoo ke dekha toh haath jalne lage.

Uss ke band-e-qaba ke jaadoo se,
saanp se ungliyon mein chalne lage.

Raah-e-gum-karda taaeron ki tarah,
phir sitaare safar pe chalne lage.

Phir nigaahon mein dhool udti hai,
aks phir aaine badalne lage. !!

Amjad Islam Amjad

Ki Hai Koi Haseen Khata Har Khata Ke Saath..

Ki hai koi haseen khata har khata ke saath,
thoda sa pyaar bhi mujhe de do saza ke saath.

Gar doobna hi apna muqaddar hai toh suno,
doobenge hum zaroor magar na-khuda ke saath.

Lau de uthe hawa ko bhi daaman toh kya ghazab,
yun hi chiraagh uljhate rahe gar hawa ke saath.

Manzil se woh bhi door tha aur hum bhi door the,
hum ne bhi dhool udaayi bahut rahnuma ke saath.

Raqs-e-saba ke jashn mein hum tum bhi naachte,
aye kaash tum bhi aa gaye hote saba ke saath.

Ikkiswin sadi ki taraf hum chale toh hain,
fitne bhi jaag uthe hain aawaz-e-paa ke saath.

Aisa laga ghareebi ki rekha se hun buland,
poochha kisi ne haal kuchh aisi adaa ke saath. !!

Kaifi Azmi

Kahin Se Laut Ke Hum Ladkhadaaye Hain Kya Kya..

Kahin se laut ke hum ladkhadaaye hain kya kya,
sitaare zer-e-kadam raat aaye hain kya kya.

Nasheb-e-hasti se afsos hum ubhar na sake,
faraaz-e-daar se paigaam aaye hain kya kya.

Jab uss ne haar ke khanjar zameen pe phenk diya,
tamaam zakhm-e-jigar muskuraaye hain kya kya.

Chhataa jahaan se uss aawaz ka ghana baadal,
wahin se dhoop ne talve jalaaye hain kya kya.

Utha ke sar mujhe itna do dekh lene de,
Ki qatl-gaah mein deewane aaye hain kya kya.

Kahin andhere se maanoos ho na jaaye adab,
charaagh tez hawa ne bujhaaye hain kya kya. !!

Kaifi Azmi

Charaaghon Ko Uchhaala Ja Raha Hai..

Charaaghon ko uchhaala ja raha hai,
hawa par raub dala ja raha hai.

Na haar apni na apni jeet hogi,
magar sikka uchhaala ja raha hai.

Woh dekho maikade ke raaste mein,
koi allaah wala ja raha hai.

The pehle hi kayi saanp aasteen mein,
ab ek bichchhu bhi pala ja raha hai.

Mere jhoote gilaason ki chhakaa kar,
behakton ko sambhaala ja raha hai.

Humin buniyaad ka patthar hain lekin,
humein ghar se nikaala ja raha hai.

Janaaze par mere likh dena yaaro,
mohabbat karne wala jaa raha hai. !!

Rahat Indori

Andhere Chaaron Taraf Saayen Saayen Karne Lage..

Andhere chaaron taraf saayen saayen karne lage,
chiraagh haath utha kar duaayen karne lage.

Taraqqi kar gaye beemariyon ke saudagar,
ye sab mareez hain jo ab dawaayen karne lage.

Lahoo-luhaan pada tha zameen par ek sooraj,
parinde apne paron se hawaayen karne lage.

Zameen par aa gaye aankhon se toot kar aansoo,
buri khabar hai farishte khataayen karne lage.

Jhulas rahe hain yahan chaanv baantne waale,
woh dhoop hai ki shajar iltizaayen karne lage.

Azeeb rang tha majlis ka khoob mehfil thi,
saffed posh uthe kaayen kaayen karne lage. !!

Rahat Indori

Aa Gayi Yaad Shaam Dhalte Hi..

Aa gayi yaad shaam dhalte hi,
bujh gaya dil chiraagh jalte hi.

Khul gaye shehar-e-ghum ke darwaaze,
ek zaraa si hawaa ke chalte hi.

Kaun tha tu ki phir na dekha tujhe,
mit gaya khwaab aankh malte hi.

Tu bhi jaise badal sa jata hai,
aks-e-deewaar ke badalte hi.

Khoon sa lag gaya hai haathon mein,
chadh gaya zehar gul masalte hi. !!

Munir Niazi

Dil Mein Kisi Ke Raah Kiye Jaa Raha Hun Main..

Dil mein kisi ke raah kiye jaa raha hun main,
kitna haseen gunaah kiye jaa raha hun main.

Duniya-e-dil tabaah kiye jaa raha hun main,
sarf-e-nigaah-o-aah kiye jaa raha hun main.

Fard-e-amal siyaah kiye jaa raha hun main,
rahmat ko bepanaah kiye jaa raha hun main.

Aisi bhi ek nigaah kiye jaa raha hun main,
zarron ko mehr-o-maah kiye jaa raha hun main.

Mujh se lage hain ishq ki azmat ko chaar chaand,
khud husn ko gawaah kiye jaa raha hun main.

Daftar hai ek maani-e-be-lafz-o-saut ka,
saada si jo nigaah kiye ja raha hun main.

Aage qadam badhaayen jinhen sujhta nahin,
raushan charaagh-e-raah kiye jaa raha hun main.

Maasoomi-e-jamaal ko bhi jis pe rashk ho,
aise bhi kuchh gunaah kiye jaa raha hun main.

Tanqeed-e-husn maslahat-e-khaas-e-ishq hai,
ye jurm gaah gaah kiye jaa raha hun main.

Gulshan-parast hun mujhe gul hi nahin azeez,
kaanton se bhi nibaah kiye jaa raha hun main.

Yun zindagi guzaar raha hun tere baghair,
jaise koi gunaah kiye jaa raha hun main.

Mujh se adaa hua hai ‘jigar justjoo ka haq,
har zarre ko gawaah kiye jaa raha hun main. !!

Jigar Moradabadi

Khush Hun Ki Zindagi Ne Koi Kaam Kar Diya..

Khush hun ki zindagi ne koi kaam kar diya,
mujh ko supurd-e gardish-e ayaam kar diya.

Saaqi siyaah-khana-e-hasti mein dekhna,
roshan charaagh kis ne sar-e shaam kar diya.

Pehle mere khuloos ko dete rahe fareb,
aakhir mere khuloos ko badnaam kar diya.

Kitni duaayen dun teri zulf-e daraaz ko,
kitna waseea silsila-e daam kar diya.

Woh chashm-e mast kitni khabardaar thi ‘adam
khud hosh mein rahi, humein badnaam kar diya. !!

Abdul Hamid Adam