Home / Bewafa Shayari

Bewafa Shayari

Zara Si Der Mein Hum Kaise Kholte Us Ko..

Zara si der mein hum kaise kholte uss ko,
tamaam umar lagi jhooth bolte uss ko.

Jise kasheed kiya tha khumaar-e-khushboo se,
misaal-e rang hawaaon mein gholtey uss ko.

Woh khwaab mein hi utarta shuaa-e subah ke saath,
hum apne aap hi palkon pe taultey uss ko.

Woh ashq tha usey aankhon mein dafan hona tha,
gauhar na tha ki sitaaron mein roltey uss ko.

Woh bewafa tha toh iqraar laazmi karta,
kuchh aur der meri jaan tatoltey uss ko.

Kisi ki aankh se ‘mohsin’ zaroor peeta hai,
tamaam shehar ne dekha hai daultey uss ko. !!

Woh Aksar Mujh Se Kehti Thi..

Woh aksar mujh se kehti thi..
Wafa hai zaat aurat ki !
Magar jo mard hote hain,
Bahut bedard hote hain..
Kisi bhanwre ki soorat,
Gul ki khushbu loot jaate hain,
Suno, tum ko kasam meri..
Riwaayat tod dena tum !
Na tanha chhod ke jana,
Na ye dil tod ke jana..

Magar phir yun hua ek din,
Mujhe anjaan raaste par,
Akela chhod kar uss ne,
Mera dil tod kar uss ne,
Mohabbat chhod di uss ne!
Wafaa hai zaat aurat ki,
Riwaayat tod di uss ne …!

Thi Jis Ki Justajoo Woh Haqeeqat Nahin Mili..

Thi jis ki justajoo woh haqeeqat nahin mili,
inn bastiyon mein hum ko rafaaqat nahin mili.

Ab tak hain iss gumaan mein ki hum bhi hain dahar mein,
iss weham se nijaat ki soorat nahin mili.

Rehna tha uss ke saath bahut der tak magar,
inn roz-o-shab mein mujh ko ye fursat nahin mili.

Kehna tha jis ko uss se kisi waqt mein mujhe,
iss baat ke kalaam ki mohlat nahin mili.

Kuchh din ke baad uss se juda ho gaye ‘munir
uss bewafa se apni tabeeyat nahin mili. !!

Munir Niazi

Ashk-e-rawan Ki Nehar Hai Aur Hum Hain Dosto..

Ashk-e-rawan ki nehar hai aur hum hain dosto,
uss bewafa ka shehar hai aur hum hain dosto.

Ye ajnabi si manzilen aur raftagaan ki yaad,
tanhaiyon ka zehar hai aur hum hain dosto.

Laayi hai ab uda ke gaye mausamon ki baas,
barkha ke rutt ka qahar hai aur hum hain dosto.

Phirte hain misl-e-mauj-e-hawa shehar shehar mein,
aawaargi ki lehar hai aur hum hain dosto.

Shaam-e-aalam dhali toh chali dard ki hawa,
raaton ka pichhla pehar hai aur hum hain dosto.

Aankhon mein udd rahi hai luti mehfilon ki dhool,
ibrat saraa-e dahar hai aur hum hain dosto. !!

Munir Niazi

Kitni Be-saakhta Khata Hun Main..

Kitni be-saakhta khata hun main,
aap ki raghbat-o-razaa hun main.

Maine jab saaz chhedna chaaha,
khaamoshi cheekh uthi sadaa hun main.

Hashr ki subah tak toh jaagunga,
raat ka aakhiri diya hun main.

Aap ne mujh ko khoob pehchaana,
waaqayi sakht bewafaa hun main.

Maine samjha tha main mohabbat hun,
maine samjha tha mudda hun main.

Kaash mujh ko koi bataaye ‘adam
kis pariwash ki baddua hun main. !!

Abdul Hamid Adam

Bhool Shayad Bahut Badi Kar Li..

Rude-couple-breakup-sad-boy-and-girl-girl-looking-boy-shayari-poetry

Bhool shayad bahut badi kar li,
dil ne duniya se dosti kar li.

Tum mohabbat ko khel kehte ho,
hum ne barbaad zindagi kar li.

Uss ne dekha badi inaayat se,
aankhon aankhon mein baat bhi kar li.

Aashiqi mein bahut zaroori hai,
bewafaai kabhi kabhi kar li.

Hum nahin jaante chiraaghon ne,
kyon andheron se dosti kar li.

Dhadkanen dafan ho gayi hongi,
dil mein deewar kyon khadi kar li. !!

Bashir Badr

Koi Kaanta Chubha Nahin Hota..

Koi kaanta chubha nahin hota,
dil agar phool sa nahin hota.

Main bhi shayad bura nahin hota,
woh agar bewafa nahin hota.

Bewafa bewafa nahin hota,
khatm ye faasla nahin hota.

Kuchh toh majbooriyan rahi hongi,
yun koi bewafa nahin hota.

Jee bahut chahta hai sach bolen,
kya karen hausla nahin hota.

Raat ka intezaar kaun kare,
aaj kal din mein kya nahin hota.

Guftgoo un se roz hoti hai,
muddaton saamna nahin hota. !!

Bashir Badr