Home / Aankhen Shayari (page 5)

Aankhen Shayari

Har Dum Duaayen Dena Har Lamha Aahen Bharna..

Har dum duaayen dena har lamha aahen bharna,
un ka bhi kaam karna, apna bhi kaam karna.

Haan kis ko hai mayyasar ye kaam kar guzarna,
ek baankpan se jeena, ek baankpan se marna.

Jo zeest ko na samjhen jo maut ko na jaanen,
jeena unhi ka jeena, marna unhi ka marna.

Teri inaayaton se mujh ko bhi aa chala hai,
teri himaayaton mein har har qadam guzarna.

Saahil ke lab se puchho dariya ke dil se puchho,
ek mauj-e-tah-nasheen ka muddat ke baad ubharna.

Aye shauq tere sadqe pahuncha diya kahan tak,
aye ishq tere qurbaan jeena hai ab na marna.

Har zarra aah jis ka labrez-e-tishnagi hai,
uss khaak ki bhi jaanib aye abr-e-tar guzarna.

Dariya ki zindagi par sadqe hazaar jaanen,
mujh ko nahin ganwara saahil ki maut marna.

Rangeeniyan nahin toh raanaaiyan bhi kaisi,
shabanam si naazneen ko aata nahin sanwarna.

Ashkon ko bhi ye jurrat allaah re teri qudrat,
aankhon tak aate aate phir dil mein jaa theharna.

Aye jaan-e-naaz aa jaa aankhon ki raah dil mein,
inn khushk nadiyon se mushkil ho kiya guzarna.

Hum be-khudaan-e-ghum se ye raaz koi seekhe,
jeena magar na jeena, marna magar na marna.

Kuchh aa chali hai aahat uss paa-e-naaz ki si,
tujh par khuda ki rahamat aye dil zara theharna.

Khoon-e-jigar ka haasil ek sher-e-tar ki soorat,
apna hi aks jis mein apna hi rang bharna. !!

Jigar Moradabadi

Har Dum Duaayen Dena Har Lamha Aahen Bharna..
5 (100%) 1 vote[s]

Teri Aankhon Ke Dariya Ka Utarna Bhi Zaroori Tha..

Anil-kapoor-madhuri-dixit-couple-painting-poetry-shayari

Teri aankhon ke dariya ka utarna bhi zaroori tha,
mohabbat bhi zaroori thi, bichhadna bhi zaroori tha.

Zaroori tha ki hum dono tawaaf-e aarzoo karte,
magar phir aarzuon ka bikharna bhi zaroori tha.

Wahi hain sooraten apni wahi main hun, wahi tum ho
magar khoya hua hun main, magar tum bhi kahin gum ho.

Mohabbat mein daghaa ki thi so kaafir the, so kaafir hain
mili hain manzilen phir bhi musaafir the, musaafir hain.

Tere dil ke nikaale hum kahaan bhatke, kahaan pahunche
magar bhatke toh yaad aaya, bhatakna bhi zaroori tha. !!

 

Teri Aankhon Ke Dariya Ka Utarna Bhi Zaroori Tha – Sung by Rahat Fateh Ali Khan (new) from aivil vin on Vimeo.

Teri Aankhon Ke Dariya Ka Utarna Bhi Zaroori Tha..
4.8 (96.36%) 11 vote[s]

Maikhana-e Hasti Mein Aksar Hum Apna Thikaana Bhool Gaye..

Maikhana-e hasti mein aksar hum apna thikaana bhool gaye,
ya hosh mein jaana bhool gaye ya hosh mein aana bhool gaye.

Asbaab toh ban jaate hain taqdeer ki zidd ko kya kahiye,
ek jaam lo pahuncha tha hum tak hum jaam uthana bhool gaye.

Aaye the bikhere zulfon ko ek roz humaare marqad par,
do ashk toh tapke aankhon se, do phool chadhaana bhool gaye.

Chaaha tha ki un ki aankhon se kuchh rang-e-bahaaran leeje,
taqreeb toh achchhi thi lekin do aankh milaana bhool gaye.

Maloom nahin aaine mein chupke se hansaa tha kaun ‘adam
hum jaam uthaana bhool gaye, woh saaz bajaana bhool gaye. !!

Abdul Hamid Adam

Maikhana-e Hasti Mein Aksar Hum Apna Thikaana Bhool Gaye..
5 (100%) 1 vote[s]

Aagahi Mein Ek Khala Maujood Hai..

Aagahi mein ek khala maujood hai,
iss ka matlab hai khuda maujood hai.

Hai yaqeenan kuchh magar waazeh nahin,
aap ki aankhon mein kya maujood hai.

Baankpan mein aur koi shayy nahin,
saadgi ki inteha maujood hai.

Hai mukammal baadshaahi ki daleel,
ghar mein gar ek boriyaa maujood hai.

Shauqiya koi nahin hota ghalat,
iss mein kuchh teri razaa maujood hai.

Iss liye tanha hun main garm-e safar,
qaafile mein rahnuma maujood hai.

Har mohabbat ki binaa hai chaashni,
har lagan mein mudda maujood hai.

Har jagah, har shehar, har iqleem mein
dhoom hai uss ki jo na-maujood hai.

Jis se chhupna chahta hun main ‘adam
woh sitamgar ja-ba-jaa maujood hai. !!

Abdul Hamid Adam

Aagahi Mein Ek Khala Maujood Hai..
5 (100%) 1 vote[s]

Apne Ehsaas Se Chhoo Kar Mujhe Sandal Kar Do..

Apne ehsaas se chhoo kar mujhe sandal kar do,
main ki sadiyon se adhoora hun muqammal kar do.

Na tumhein hosh rahe na mujhe hosh rahe,
iss qadar toot ke chaaho, mujhe paagal kar do.

Apne honthon se koi mohar lagaao mujh par, 
ek nazar pyaar se dekho mujhe ghayal kar do.

Tum apni hatheli ko mere pyaar ke mehandi se rango,
apni aankhon mein mere naam ka kaajal kar do.

Iss ke saaye mein mere khwaab mehak uthenge,
mere chehre pe chamakta hua aanchal kar do.

Dhoop hi dhoop hun main toot ke barso mujh pe,
iss qadar barso meri rooh mein jal – thal kar do.

Jaise sehraaon mein har shaam hawaa chalti hai,
uss tarah mujh mein chalo aur mujhe thall kar do.

Tum chhupa lo mera dil aout mein apne dil ke,
aur mujhe meri nighaahon se bhi ojhal kar do.

Masla hun toh nighaahen na churaao mujh se,
apni chaahat se tawaja se mujh hal kar do.

Apne ghum se keho har waqt mere saath rahe,
ek ehsaan karo uss ko musalsal kar do.

Mujh pe chhaa jaao kisi aag ki soorat janaa,
aur meri zaat ko sookha hua jungle kar do. !!

Wasi Shah

Apne Ehsaas Se Chhoo Kar Mujhe Sandal Kar Do..
5 (100%) 2 vote[s]

Meri Yaad Aaye Toh Chhat Par Diya Jalana..

Girl-woman-lighting-on-tarrace-ladki-diya-jalati-hui-shayari-poetry

Main jaanta hun ki ab chhaton par,
Diye jalaane ki rasm baaqi nahin rahi hai..
Magar tumhein meri yaad aaye ,
Toh yaad rakho..
Tum apni aankhon se
Aansuon ke chamakte moti na girne dena,
Bas itna karna,
Ki apni chhat par..
Meri mohabbat ki nazm gaa kar ,
Meri rafaaqat ko yaad kar ke,
Diya jalaana..
Tum apni chhat par kisi bhi kone mein baith kar,
Ek diya jalaana …!

Meri Yaad Aaye Toh Chhat Par Diya Jalana..
5 (100%) 3 vote[s]

Kaisa Maftooh Manzar Hai Kayi Sadiyon Se..

Kaisa maftooh manzar hai kayi sadiyon se,
mere qadamon pe mera sar hai kayi sadiyon se.

Khauf rehta hai na sailaab kahin le jaaye,
meri palkon pe tera ghar hai kayi sadiyon se.

Ashk aankhon mein sulagte hue so jaate hain,
ye meri aankh jo banjar hai kayi sadiyon se.

Kaun kehta hai mulaqaat meri aaj ki hai,
tu meri rooh ke andar hai kayi sadiyon se.

Maine jis ke liye har shakhs ko naraaj kiya,
rooth jaaye na yahi dar hai kayi sadiyon se.

Uss ko aadat hai jaden kaaTte rehne ki ‘wasi
jo meri zaat ka mehwar hai kayi sadiyon se. !!

Wasi Shah

Kaisa Maftooh Manzar Hai Kayi Sadiyon Se..
5 (100%) 2 vote[s]