Home / Aankhen Shayari (page 4)

Aankhen Shayari

Teri Aankhon Ke Dariya Ka Utarna Bhi Zaroori Tha..

Anil-kapoor-madhuri-dixit-couple-painting-poetry-shayari

Teri aankhon ke dariya ka utarna bhi zaroori tha,
mohabbat bhi zaroori thi, bichhadna bhi zaroori tha.

Zaroori tha ki hum dono tawaaf-e aarzoo karte,
magar phir aarzuon ka bikharna bhi zaroori tha.

Wahi hain sooraten apni wahi main hun, wahi tum ho
magar khoya hua hun main, magar tum bhi kahin gum ho.

Mohabbat mein daghaa ki thi so kaafir the, so kaafir hain
mili hain manzilen phir bhi musaafir the, musaafir hain.

Tere dil ke nikaale hum kahaan bhatke, kahaan pahunche
magar bhatke toh yaad aaya, bhatakna bhi zaroori tha. !!

 

Teri Aankhon Ke Dariya Ka Utarna Bhi Zaroori Tha – Sung by Rahat Fateh Ali Khan (new) from aivil vin on Vimeo.

Maikhana-e Hasti Mein Aksar Hum Apna Thikaana Bhool Gaye..

Maikhana-e hasti mein aksar hum apna thikaana bhool gaye,
ya hosh mein jaana bhool gaye ya hosh mein aana bhool gaye.

Asbaab toh ban jaate hain taqdeer ki zidd ko kya kahiye,
ek jaam lo pahuncha tha hum tak hum jaam uthana bhool gaye.

Aaye the bikhere zulfon ko ek roz humaare marqad par,
do ashk toh tapke aankhon se, do phool chadhaana bhool gaye.

Chaaha tha ki un ki aankhon se kuchh rang-e-bahaaran leeje,
taqreeb toh achchhi thi lekin do aankh milaana bhool gaye.

Maloom nahin aaine mein chupke se hansaa tha kaun ‘adam
hum jaam uthaana bhool gaye, woh saaz bajaana bhool gaye. !!

Abdul Hamid Adam

Aagahi Mein Ek Khala Maujood Hai..

Aagahi mein ek khala maujood hai,
iss ka matlab hai khuda maujood hai.

Hai yaqeenan kuchh magar waazeh nahin,
aap ki aankhon mein kya maujood hai.

Baankpan mein aur koi shayy nahin,
saadgi ki inteha maujood hai.

Hai mukammal baadshaahi ki daleel,
ghar mein gar ek boriyaa maujood hai.

Shauqiya koi nahin hota ghalat,
iss mein kuchh teri razaa maujood hai.

Iss liye tanha hun main garm-e safar,
qaafile mein rahnuma maujood hai.

Har mohabbat ki binaa hai chaashni,
har lagan mein mudda maujood hai.

Har jagah, har shehar, har iqleem mein
dhoom hai uss ki jo na-maujood hai.

Jis se chhupna chahta hun main ‘adam
woh sitamgar ja-ba-jaa maujood hai. !!

Abdul Hamid Adam

Apne Ehsaas Se Chhoo Kar Mujhe Sandal Kar Do..

Apne ehsaas se chhoo kar mujhe sandal kar do,
main ki sadiyon se adhoora hun muqammal kar do.

Na tumhein hosh rahe na mujhe hosh rahe,
iss qadar toot ke chaaho, mujhe paagal kar do.

Apne honthon se koi mohar lagaao mujh par, 
ek nazar pyaar se dekho mujhe ghayal kar do.

Tum apni hatheli ko mere pyaar ke mehandi se rango,
apni aankhon mein mere naam ka kaajal kar do.

Iss ke saaye mein mere khwaab mehak uthenge,
mere chehre pe chamakta hua aanchal kar do.

Dhoop hi dhoop hun main toot ke barso mujh pe,
iss qadar barso meri rooh mein jal – thal kar do.

Jaise sehraaon mein har shaam hawaa chalti hai,
uss tarah mujh mein chalo aur mujhe thall kar do.

Tum chhupa lo mera dil aout mein apne dil ke,
aur mujhe meri nighaahon se bhi ojhal kar do.

Masla hun toh nighaahen na churaao mujh se,
apni chaahat se tawaja se mujh hal kar do.

Apne ghum se keho har waqt mere saath rahe,
ek ehsaan karo uss ko musalsal kar do.

Mujh pe chhaa jaao kisi aag ki soorat janaa,
aur meri zaat ko sookha hua jungle kar do. !!

Wasi Shah

Meri Yaad Aaye Toh Chhat Par Diya Jalana..

Girl-woman-lighting-on-tarrace-ladki-diya-jalati-hui-shayari-poetry

Main jaanta hun ki ab chhaton par,
Diye jalaane ki rasm baaqi nahin rahi hai..
Magar tumhein meri yaad aaye ,
Toh yaad rakho..
Tum apni aankhon se
Aansuon ke chamakte moti na girne dena,
Bas itna karna,
Ki apni chhat par..
Meri mohabbat ki nazm gaa kar ,
Meri rafaaqat ko yaad kar ke,
Diya jalaana..
Tum apni chhat par kisi bhi kone mein baith kar,
Ek diya jalaana …!

Kaisa Maftooh Manzar Hai Kayi Sadiyon Se..

Kaisa maftooh manzar hai kayi sadiyon se,
mere qadamon pe mera sar hai kayi sadiyon se.

Khauf rehta hai na sailaab kahin le jaaye,
meri palkon pe tera ghar hai kayi sadiyon se.

Ashk aankhon mein sulagte hue so jaate hain,
ye meri aankh jo banjar hai kayi sadiyon se.

Kaun kehta hai mulaqaat meri aaj ki hai,
tu meri rooh ke andar hai kayi sadiyon se.

Maine jis ke liye har shakhs ko naraaj kiya,
rooth jaaye na yahi dar hai kayi sadiyon se.

Uss ko aadat hai jaden kaaTte rehne ki ‘wasi
jo meri zaat ka mehwar hai kayi sadiyon se. !!

Wasi Shah

Tum Meri Aankh Ke Tewar Na Bhula Paaoge..

couple-hugging-sad-seprating-painting-image-wasi-shah-poetry-shayari

Tum meri aankh ke tewar na bhula paaoge,
ankahi baat ko samjhoge toh yaad aaunga.

Hum ne khushiyon tarah dukh bhi ikatthe dekhe,
safha-e zeest ko paltoge toh yaad aaunga.

Iss judaai mein tum andar se bikhar jaaoge,
kisi mazoor ko dekhoge toh yaad aaunga.

Issi andaaz mein hote the mukhaatib mujh se,
khat kisi aur ko likhoge toh yaad aaunga.

Meri khushbu tumhen kholegi gulaabon ki tarah,
tum agar khud se na bologe toh yaad aaunga.

Aaj toh mehfil-e yaaraan pe ho maghroor bahut,
jab kabhi toot ke bikhroge toh yaad aaunga. !!

Wasi Shah

Samundar Mein Utarta Hun Toh Aankhen Bheeg Jaati Hain..

Samundar mein utarta hun toh aankhen bheeg jaati hain,
teri aankhon ko padhta hun toh aankhen bheeg jaati hai.

Tumhara naam likhne ki ijaazat chhin gayi jab se,
koi bhi lafz likhta hun toh aankhen bheeg jaati hain.

Teri yaadon ki khushbu khidkiyon mein raqs karti hai,
tere ghum mein sulagta hun toh aankhen bheeg jaati hain.

Na jaane ho gaya hun iss qadar hasaas main kab se,
kisi se baat karta hun toh aankhen bheeg jaati hain.

Main sara din bahut masroof rehta hun magar jyon hi,
qadam chaukhat pe rakhta hun toh aankhen bheeg jaati hain.

Har ek muflis ke maathe par alam ki daastaanen hain,
koi chehra bhi padhta hun toh aankhen bheeg jaati hain.

Bade logon ke oonche badnuma aur sard-mehlon ko,
gareeb aankhon se taktaa hun toh aankhen bheeg jaati hain.

Tere kooche se ab mera taalluq waajibi sa hai,
magar jab bhi guzarta hun toh aankhen bheeg jaati hain.

Hazaaron mausamon ki hukmaraani hai mere dil par,
wasi’ main jab bhi hansta hun toh aankhen bheeg jaati hain. !!

Wasi Shah

Aankhon Mein Chubh Gayi Teri Yaadon Ki Kirchiyaan..

romantic_love_couple_in_night_moon_lovely

Aankhon mein chubh gayi teri yaadon ki kirchiyaan,
kaandhon pe ghum ki shaal hai aur chaand raat hai.

Dil tod ke khamosh nazaaron ka kya mila ?
shabnam ka ye sawaal hai aur chaand raat hai.

Campus ki nehar par hai tera haath haath mein,
mausam bhi laa-zawaal hai aur chaand raat hai.

Har ek kali ne odh liya maatami libaas,
har phool pur-malaal hai aur chaand raat hai.

Chhalkaa sa pad raha hai ‘wasi wehshaton ka rang,
har cheez pe zawaal hai aur chaand raat hai. !!

Wasi Shah

Main Bhi Khush Hun Koi Uss Se Jaa Ke Keh Dena..

Aaditya-roy-kapoor-shardha-kapoor-couple-rude-aashique-2

Main bhi khush hun koi uss se jaa ke keh dena,
agar woh khush hai mujhe be’qaraar karte hue.

Tumhen khabar hi nahin hai ki koi toot gaya,
mohabbaton ko bahut paaedaar karte hue.

Main muskurata hua aaine mein ubharunga,
woh ro padegi achaanak singhaar karte hue.

Mujhe khabar thi ki ab laut kar na aaunga,
so tujh ko yaad kiya dil pe waar karte hue.

Ye keh rahi thi samundar nahin ye aankhen hain,
main inn mein doob gaya aitbaar karte hue.

Bhanwar jo mujh mein pade hain woh main hi jaanta hun,
tumhare hijr ke dariya ko paar karte hue. !!

Wasi Shah