Home / Aankhen Shayari (page 2)

Aankhen Shayari

Ek Aazaar Hui Jaati Hai Shohrat Hum Ko..

Ek aazaar hui jaati hai shohrat hum ko,
khud se milne ki bhi milti nahin fursat hum ko.

Roshni ka ye musaafir hai raah-e-jaan ka nahin,
apne saaye se bhi hone lagi wehshat hum ko.

Aankh ab kis se tahayyur ka tamasha maange,
apne hone pe bhi hoti nahin hairat hum ko.

Ab ke ummeed ke shole se bhi aankhen na jali,
jaane kis mod pe le aayi mohabbat hum ko.

Kaun si rut hai zamaane humen kya maloom,
apne daaman mein liye phirti hai hasrat hum ko.

Zakhm ye wasl ke marham se bhi shayad na bhare,
hijr mein aisi mili ab ke masaafat hum ko.

Daagh-e-isyaan toh kisi taur na chhupte ‘amjad
dhaanp leti na agar chaadar-e-rahmat hum ko. !!

Amjad Islam Amjad

Hai Dua Yaad Magar Harf-e-Dua Yaad Nahin..

Hai dua yaad magar harf-e-dua yaad nahin,
mere naghmaat ko andaaz-e-nawa yaad nahin.

Maine palakon se dar-e-yaar pe dastak di hai,
main woh saail hun jise koi sadaa yaad nahin.

Maine jin ke liye raahon mein bichhaaya tha lahoo,
hum se kehte hain wahi ahad-e-wafa yaad nahin.

Kaise bhar aayi sar-e-shaam kisi ki aankhen,
kaise tharraai charaaghon ki ziya yaad nahin.

Sirf dhundhlaaye sitaaron ki chamak dekhi hai,
kab hua kaun hua kis se khafa yaad nahin.

Zindagi jabr-e-musalsal ki tarah kaati hai,
jaane kis jurm ki paayi hai saza yaad nahin.

Aao ek sajda karen aalam-e-madHoshi mein,
log kehte hain ki ‘saghar ko khuda yaad nahin. !!

Saghar Siddiqui

Aur Chupke Chupke Ro Lena..

Jab seena ghum se bojhal ho
aur yaad kisi ki aati ho
tab kamre mein band ho jana
aur chupke chupke ro lena..
Jab aankhen baaghi ho jaayen
aur yaad mein meri bhar aayen
phir khud ko dhokha mat dena
aur chupke chupke ro lena..
Jab palken karb se moondi ho
aur sab samjhen tum sote ho
tab munh pe takiya rakh lena
aur chupke chupke ro lena..
Ye duniya zaalim duniya hai
ye baat bahut phailaayegi
tum saamne sab ke chup rehna
aur chupke chupke ro lena..
Jab baarish chehra dho daale
aur ashq bhi boonden lagti ho
woh lamha hargiz mat khona
aur chupke chupke ro lena …!!

Tum Itna Jo Muskura Rahe Ho..

Tum itna jo muskura rahe ho,
kya ghum hai jis ko chhupa rahe ho.

Aankhon mein nami hansi labon par,
kya haal hai kya dikha rahe ho.

Ban jaayenge zehar peete peete,
ye ashk jo peete ja rahe ho.

Jin zakhmon ko waqt bhar chala hai,
tum kyon unhen chhede ja rahe ho.

Rekhaaon ka khel hai muqaddar,
rekhaaon se maat kha rahe ho. !!

Kaifi Azmi

Andar Ka Zehar Choom Liya Dhul Ke Aa Gaye..

Andar ka zehar choom liya dhul ke aa gaye,
kitne shareef log the sab khul ke aa gaye.

Sooraj se jung jeetne nikle the bewqoof,
saare sipaahi mom ke the ghul ke aa gaye.

Masjid mein door door koi dusra na tha,
hum aaj apne aap se mil jul ke aa gaye.

Neendon se jung hoti rahegi tamaam umar,
aankhon mein band khwaab agar khul ke aa gaye.

Sooraj ne apni shakl bhi dekhi thi pehli baar,
aaine ko maze bhi taqaabul ke aa gaye.

Anjaane saaye phirne lage hain idhar udhar,
mausam humare shehar mein kaabul ke aa gaye. !!

Rahat Indori

Sirf Khanjar Hi Nahin Aankhon Mein Paani Chahiye..

Sirf khanjar hi nahin aankhon mein paani chahiye,
aye khuda dushman bhi mujh ko khaandaani chahiye.

Shehar ki saari alif-lailaayen burhi ho chuki,
shehzaade ko koi taaza kahaani chahiye.

Maine aye sooraj tujhe pooja nahin samjha toh hai,
mere hisse mein thodi dhoop aani chahiye.

Meri qeemat kaun de sakta hai iss bazaar mein,
tum zulekha ho tumhe qeemat lagaani chahiye.

Zindagi hai ek safar aur zindagi ki raah mein,
zindagi bhi aaye toh thokar lagaani chahiye.

Maine apni khushk aankhon se lahoo chhalka diya,
ek samundar keh raha tha mujh ko paani chahiye. !!

Rahat Indori

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Andhere Chaaron Taraf Saayen Saayen Karne Lage..

Andhere chaaron taraf saayen saayen karne lage,
chiraagh haath utha kar duaayen karne lage.

Taraqqi kar gaye beemariyon ke saudagar,
ye sab mareez hain jo ab dawaayen karne lage.

Lahoo-luhaan pada tha zameen par ek sooraj,
parinde apne paron se hawaayen karne lage.

Zameen par aa gaye aankhon se toot kar aansoo,
buri khabar hai farishte khataayen karne lage.

Jhulas rahe hain yahan chaanv baantne waale,
woh dhoop hai ki shajar iltizaayen karne lage.

Azeeb rang tha majlis ka khoob mehfil thi,
saffed posh uthe kaayen kaayen karne lage. !!

Rahat Indori

Zindagi Ko Zakhm Ki Lazzat Se Mat Mahroom Kar..

Zindagi ko zakhm ki lazzat se mat mahroom kar,
raaste ke pattharon se khairiyat maloom kar.

Toot kar bikhri hui talwaar ke tukde samett,
aur apne haar jaane ka sabab maloom kar.

Jaagti aankhon ke khwaabon ko ghazal ka naam de,
raat bhar ki karwaton ka zaaiqa manzoom kar.

Shaam tak laut aaunga haathon ka khaali-pan liye,
aaj phir nikla hun main ghar se hatheli choom kar.

Mat sikha lahje ko apni barchhiyon ke paintare,
zinda rehna hai toh lahje ko zara masoom kar. !!

Rahat Indori

Aankh Mein Paani Rakho Honthon Pe Chingaari Rakho..

Aankh mein paani rakho honthon pe chingaari rakho,
zinda rehna hai toh tarqeeben bahut saari rakho.

Raah ke patthar se badh kar kuchh nahin hain manzilen,
raaste aawaaz dete hain safar jaari rakho.

Ek hi nadi ke hain ye do kinaare dosto,
dostaana zindagi se maut se yaari rakho.

Aate jaate pal ye kehte hain humare kaan mein,
kooch ka elaan hone ko hai taiyyari rakho.

Ye zaroori hai ki aankhon ka bharam qaayam rahe,
neend rakho ya na rakho khwaab meyaari rakho.

Ye hawaayen udd na jaayen le ke kaaghaz ka badan,
dosto mujh par koi patthar zara bhaari rakho.

Le toh aaye shayari bazaar mein ‘rahat miyaan,
kya zaroori hai ki lehje ko bazaari rakho. !!

Rahat Indori