Home / Ghazals / Aa Ke Patthar To Mere Sehan Mein Do Chaar Gire – Shakeb Jalali

Aa Ke Patthar To Mere Sehan Mein Do Chaar Gire – Shakeb Jalali

Shakeb Jalali Ghazal : Aa Ke Patthar Toh Mere Sehan Mein Do Chaar Gire

Aa ke patthar toh mere sehan mein do chaar gire,
jitne us ped ke phal the pas-e deewaar gire.

Aisi dahshat thi fazaaon mein khule paani ki,
aankh jhapki bhi nahin haath se patwaar gire.

Mujhe girna hai toh main apne hi qadmon mein girun,
jis tarah saaya-e deewaar pe deewaar gire.

Teergi chhod gaye dil mein ujaale ke ḳhutoot,
ye sitaare mere ghar toot ke bekaar gire.

Kya hawa haath mein talvaar liye phirti thi,
kyon mujhe dhaal banaane ko ye chhitnaar gire.

Dekh kar apne dar-o baam laraz jaata hoon.
mere hum-saaye mein jab bhi koi deewaar gire.

Waqt ki dor ḳhuda jaane kahan se toote,
kis ghadī sar pe ye latki hui talvaar gire.

Hum se takra gayi ḳhud badh ke andhere ki chattaan,
hum sambhal kar jo bahut chalte the na-chaar gire.

Kya kahun deeda-e tar ye toh mera chehra hai,
sang kat jaate hain baarish ki jahan dhaar gire.

Haath aaya nahin kuchh raat ki daldal ke siwa,
haaye kis mod pe ḳhwaabon ke parastar gire.

Woh tajalli ki shuaayen thin ki jalte hue par,
aaine toot gaye aaina-bardaar gire.

Dekhte kyon ho ‘shakeb’ itni bulandi ki taraf,
na uthaya karo sar ko ki ye dastaar gire. !!

Aa Ke Patthar To Mere Sehan Mein Do Chaar Gire – Shakeb Jalali
5 (100%) 2 votes

Leave a Reply

Your email address will not be published.

Comment moderation is enabled. Your comment may take some time to appear.